Shir jaraa'id oo uu maanta Muqdisho ku qabtay xeer
ilaaliyaha guud ee ciidamada DF; G/sare: C/naasir Axmed Max'ed ayaa
sheegay inay 79-askari loo xirxiray sababo la xiriira dhac ay u
geysteen dad rayid ah.
G/sare C/naasir ayaa xusay in askartaas lagu soo qabqabtay howlgalo
ay dhawaan bilaabeen Booliiska Somalia, taasoo looga hortagayo dhac iyo
dhibaateynta shacabka ay ku hayaan ciidamada DF iyo kuwa xirtay dharka
ciidamada.
"Dhawaan ayaa maxkamad la saari doonaa askartaan, waxaana lagu qaadi
doonaa xukumadii lagu rido" ayuu yiri xeer ilaaliyaha ciidamada DF,
isagoo intaas ku daray in talaabadan ay tahay mid looga hortagayo in
shacabka la dhaco.
Ciidamadan ayaa ku xiran xabsiyo kala duwan oo ku yaala Muqdisho,
iyadoo xeer ilaaliyuhu uu ku sheegay shirkiisa jaraa'id in intooda
badan la qabtay iyagoo dhac ay ka geysteen degmada Xamarweyne.
"DF waxay xooga saaraysaa sidii ay shacabku ugu kalsoonaan lahaayeen
ciidamada, waxaana bilowday howlgalo lagu raadinayo kuwa dhaca u geysta
shacabka intii ay badbaadin lahaayeen" ayuu yiri G/sare C/naasir.
Xeer ilaaliyuhu, wuxuu ka dhawaajiyay in tan iyo intii la dhisay DF
ay xukumo dil ah ku fulisay 9-askari oo ahaa kuwo askar kale dilay iyo
mid haweeney rayid ah ku toogtay bartamaha Degmada Xamarweyne.
"Askarigii lagu xukumo dil waa la dilayaa, askarigii muteysta
xarigna waa la xirayaa" ayuu kaga jawaabay xeer ilaaliyuhu su'aal ahayd
in askarta lagu xukumayo dil iyo in kale.
Taliyaha Booliiska DF Gen. Cabdi Xasan Cawaale [Qaybdiid] ayaa
sheegay maalmo ka hor in 15-askari ay u xiran yihiin sababo salka ku
haya dhac ay geysteen dad rayid ah, isagoo xusay inay maxkamad saari
doonaan.
Garowe Online, Muqdisho
