Afhayeenka Ururka hubeysan ee Al-shabaab Sheekh Mukhtaar Robow [Abu-Mansur] ayaa daboolka ka qaaday in ururkiisa uu weerari doono Degmada Baydhabo ee xarunta Gobolka Bay oo fariisin u ah Baarlamaanka DF.

Abu-Mansur, wuxuu sheegay inay heleen qorshayaal ay ku doonayaan xildhibaannada ugu jira Baarlamaanka Somalia Digil iyo Mirifle weerar ay ku qaadaan goobaha ay Al-shabaab kaga sugan yihiin Bay iyo Bakool.

"Qorshahaan waa mid fashilmay, waxaana u digaynaa xildhibaannadan wada fikirkaan, haddii ay joojin waayaanna waxay la kulmi doonaan ciqaab adag, marka aan gacanta ku dhigno" ayuu yiri Sheekh Abu-Mansur.

Wuxuu intaas ku daray afhayenku, in qorshayasha lagu dagaalamayo Islaamka ay horay u qaateen xubno ay mid yihiin Xildhibaan Muuse Suudi Yalaxow, Xildhibaan Max'ed Qanyar Afrax iyo kuwo kale ayna ku fashilmeen.

"Xildhibanada Digil iyo Mirifle waxay doonayan waa inay Islaamka weeraran, ayna deegaano nabad ah ka dhigaan kuwo coladeed, shacabka Gobolladas waan uga digaynaa, sidoo kalena waxaan u sheegaynaa in qorshayaashaas ay ka haraan maadaama aysan ku guulaysanayn" ayuu mar kale saxaafadda Baydhabo u sheegay Sheekh Abu-Masor.

Dhawanahan ayaa waxaa jiray qorshayaal ay wadeen xildhibanno ka tirsan Barlamanka Somalia, gaar ahaan kuwa kasoo jeeda Gobollada Bay iyo Bakol, kuwaasoo damacsan inay weerar ku qaadaan goobaha ay Al-shabaab kaga sugan tahay Gobolladaas.

Mar la weydiiyay Abu-Mansur, inuu tagersan yahay dadaallo lagu nabadeynayo goboolladaas oo ay wadaan odayaasha Digil iyo Mirifl ayuu sheegay inuu taageerayo wax walba oo wanaag ah, balse haddii ay dhan u janjeersadaan uu qaadacayo.