Dagaal u dhexeeyay beelo isku haysta dhul ayaa mar kale dib uga qarxay maanta deegaanada Bacaadweyn iyo Camaaro oo ka tirsan Gobolka Mudug, iyadoo labada dhinac ay isku adeegsanayaan hub culus.

Goobjoogayaal ku sugan deegaanada ay dagaaladu ka dhacayaan ayaa sheegay in dhinac ka mid ah labada dhinac uu weerarka soo qaaday, iyadoo koox walba ay doonayso inay ku sugnaato deegaankeeda.

Wararka ugu horeeya ee dagaalkaas ka imaanaya ayaa waxay sheegayaan inay ku dhinteen 6-qof ayna ku dhaawacmeen tiro intaas ka badan, iyadoo aanay ku jirin dad rayid ah.

"Dagaalku wuxuu ka socday meel ku dhow deegaanka Bacaadweyn, waxaana la isku adeegsanayaan hubka culus iyo midka fudud, waxba lagama sheegi karo hada" ayuu yiri mid ka mid ah horjoogayaasha kooxaha dagaalku u dhexeeyo oo la xiriiray saxaafada.

Dagaalkan ayaa daba socda dagaalo ay dad badan ku dhinteen oo horay u ugu dhexmaray labada beelood oo kasoo kala jeeda Dir iyo Habar-gidir ayaa loo waayay wax xal ah, iyadoo beesha Camaara ay ku adkeysatay in dhulkeeda lagu haysto.

"Waxaan ogolaanay dhexdhexaadin walba oo la doonayay in lagu joojiyo dagaalka, balse beesha Saleebaan ee Habar-gidir ayaa diiday dhexdhexaadinta, waxaana ay doonayaan inay dhulkeena xoog ku qabsadaan" ayuu yiri Nabadoon u hadlay Beesha Dir, gaar ahaan Qubeys.

Beelaha dagaalkooda ayaa la sheegay inuu yahay mid xoogan, waxaana ka horeeyay dagaal aan xooganayn oo shalay gabal-dhicii ka dhacay deegaanada ay isku horfadhiyeen.