Wasaarada arimaha dibada ee Somalia ayaa maanta shaacisay inay dib u dhigtay ka qaybgalka shirkii ay ku baaqday IGAD ee lagu waday inuu beri ka furmo Magaalada Nairobi ee dalka Kenya.

Agaasimaha guud ee wasaarada arimaha dibada Somalia Max'ed Jaamac Cali oo maanta shir jaraa'id qabtay xafiiskiisa Muqdisho ayaa xusay in dib loo dhigay shirka ilaa 26-ka bishan.

"Sababta aan dib ugu dhignay ka qaybgalka shirkan waa iyadoo aanan waxba ka hayn ujeedada rasmiga ah ee shirkaas ka dambeysa" ayuu yiri Max'ed Jaamac Cali.

Wasiirada arimaha dibada ee IGAD oo kulan ku qaatay dhawaan dalka Mareykanka ayaa loogu yeeray xukumada Somalia oo dhan, si looga hadlo xalada ka jirta Somalia, iyadoo warar soo baxayna ay sheegeen in xukuumada isku shaandheyn lagu sameyn doono.

Gudoomiyaha Baarlamaanka Somaalia Sheekh Aadan Max'ed Nuur [Madoobe] ayaa saxaafada u sheegay inaysan waxba ka jirin wararka sheegaya in xukuumada la badalayo ama ay saldhigyo ka sameysanayso Kenya.

"Dowlada ma jirto cid isku shaandheyn karta ama badali karta, waayo inaga ayaa is dooranay ee IGAD nama dooran, aniga waxaan ahaa xildhibaan, waxaana gudoomiye ii doortay baarlamaanka" ayuu yiri Sheekh Aadan Madoobe.

Afhayeenka Baarlamaanku wuxuu si caro leh uga jawaabay hadalo sheegayay in xukuumada la dajin doono Nairobi, isagoo sheegay in wararkaas ay yihiin kuwo been abuur ah.

Madaxweyne ku xigeenka Kenya Kalonzo Musyoka ayaa ku sheegay war-saxaafadeed uu kasoo saaray xafiiskiisa Nairobi in Kenya ay kala shaqeynayso IGAD nabad lagu soo dabaalo Somalia.

Kalonzo Musyoka, wuxuu carabka ku dhuftay in dhibaatada ugu weyn ee haysata Somalia ay ka mid yihiin dagaalo aan dhamaad lahayn iyo burcadbadeed caado ka dhigtay inay afduubtaan Maraakiibta.

"Kenya waxay nabad heli kartaa oo keliya marka ay Somalia nabad hesho" ayuu ku sheegay war-saxaafadeedka uu soo saaray madaxweyne ku xigeenka Kenya Kalonzo Musyoka.

Dhanka kale, Agaasimaha wasaarada arimaha dibada ee Somalia ayaa beeniyay hadalkii safiirka Somalia u fadhiya Ruushka Max'ed Max'ud Xandul uu ku sheegay in Somalia ay aqoonsan tahay maamulada ka jira Gobolada South Oscietia iyo Abkhazia.