Madaxweynaha Jabuti Ismaaciil Cumar Gelle oo wareysi siiyay Reuters ayaa sheegay in hogaanka cusub ee Somalia uu dunida kaga baahan doono kaalmo lacageed, si uu dib ugu dhiso dalka ay dagaaladu burburiyeen [Somalia].

Geelle oo dalkiisa uu martigelinayo shirka dib u heshiisiinta Somalida ee lagu dhisayo xukuumada cusub ayaa dunida ku boorriya inay lacag ku taageeraan maamulka cusub ee loo sameynayo si dib loogu habeeyo ciidanka amaanka.

"Madaxweynaha cusub wuxuu u bahan doonaa kaalmo, hadii uu helo kaalmo dhaqale, wuxuu dib u dhisi karaa dalkiisa" ayuu yiri Ismaaciil Cumar Geelle oo lagu wareystay Madaxtooyada Jabuuti.

Dublamaasiyiinta caalami ah ayaa waxay qabaan in amaanka Somalia ay soo celin karaan 10,000 askari, iyadoo Madaxweyne Geelle uu sheegay in askartaas ay qaadan karaan lacag ka yar tan ku baxaysa nabad ileeliyeyaasha.

Madaxweynaha Jabuuti, wuxuu sheegay in kooxda Al-shabaab ay ka kooban yihiin burcadii beelaha oo isku tagay, iyagoo ka shaqeynaya carqalada dalka, wuxuuna kooxdan ku eedeeyay inay yihiin koox dadka disha oo keliya.

"Waxba kama garanayaan diinta Islaamka, keliya waxay garanayaan sida wax loo dilo, hada waxay isku qarinayaan magaca Al-shabaab" ayuu yiri Geelle oo ku tilmaamay Al-shabaab inay yihiin koox aan u daneynayn shacabkooda.

Mar uu ka hadlay awoodqaybsiga shirka Jabuuti ayuu sheegay in loo baahan yahay in si weyn looga fikiro awooda marka laga tago Madaxweyne iyo Ra'iisul wasaare, isagoo soo jeediyay in la sameeyo Madaxweyne ku xigeen sida Mareykanka.

Xilka Madaxweynenimo ee Somalia ayaa waxaa u taagan murashaxiin badan, iyadoo ay ugu cadcad yihiin Sheekh Shariif iyo Nuur Cadde, iyadoo labadan mas'uul uu mid noqon doono Madaxweynaha cusub ee Somalia sida la aaminsan yahay.

RADIO GAROWE