Ra'iisul wasaaraha Somalia Nuur Xasan Xuseen [Nuur Cadde] ayaa gabi ahaan kala diray gudigii maamul u sameynta Gobolka Banaadir, isagoo ku eedeeyay inay ku guuldaresyteen inay qabtaan howshiii loo igmaday.

Nuur Cadde ayaa qoraal uu ku kala dirayo gudigaas u diray, iyadoo gudigan oo lagu waday inuu mudo 15-maalmood ah ay ku dhisaan maamulka Gobolka Banaadir ay sii marayaan laba bilood.

"Ma garanayno wuxuu qoonasay Ra'iisul wasaaruhu, waxaa gudiga la gaarsiiyay qoraal lagu amrayo inay howlahooda joojiyaan ayna fasaxan yihiin" ayuu Garowe Online u sheegay mid ka mid ah saraakiisha ku dhowdhow Nuur Cadde.

Gudigan ayaa dhowr jeer oo hore ka codsaday Madaxweyne Yuusuf iyo Ra'iisul wasaare Nuur Cadde in loo kordhiyo xiliga maamul sameynta, iyagoo dhawaan soo bandhigay shaxda gudiga dooranaya gudoomiyaha G/Banaadir.

Beelaha Soomaaliyeed ayaa ku tilmaamay shaxda uu gudigan soo bandhigay mid aysan ku qanacsanayn, iyadoo beesha Abgaal ay ku dooday in maamulka Gobolka Banaadir aan lagu sameyn karin nidaamka 4.5-ka.

Max'ed Dheere oo ah gudoomiyihii hore ee Gobolka Banaadir ahna musharax u taagan jagadaas ayaa ku eedeeyay gudigan inay lusandeen lacag gaaraysa $90,000.

Lacagtan ayuu sheegay inay bixisay Qaramada Midoobay looguna talogalay maamul sameynta Gobolka Banaadir, balse ma jirto cid uu si gaar ah u sheegay inay lacagtaas lunsatay.

Shirkii bishii hore ka dhacay Nairobi ee ay soo qabanqaabisay IGAD ayaa looga dalbay gudigaan inay mudo 15-maalmood ah kusoo dhisaan maamulka Gobolka Banaadir, iyagoo taasna ku guulaysan waayay.

Gudiga laga joojiyay howshooda ayaan weli la hadlin saxaafada, waxaana shaqo joojintooda ay kusoo beegmaysaa iyadoo shirkii dib u heshiisiinta uu ka furmayo Jabuuti maalmahan.
 
Garowe Online, Muqdisho