Wararka
Gudiyadii DF iyo ARS oo gaaray S.Africa
By
Oct 11, 2008 - 7:46:49 AM

Gudiyadii amaanka iyo siyaasada ee DF iyo mucaaradka ARS ayaa maanta gaaray dalka South Africa halkaasoo ay ku qaadan doonaan siminaar socon doona mudo ka badan 5-maalmood.

Xubnaha DF iyo mucaaradka oo ka kooban min 11-xubnood ayaa waxaa halkaas kusoo dhaweeyay wafdi ka socda UN-ka oo uu hogaaminayo wakiilka gaarka ee arimaha Somalia Ahmadou Ould-Abdallah.

Wafdiga labada dhinac ayaa waxaa ka mid ah; Wasiirka warfaafinta Somalia Axmed C/salaan Xaaji Aadan, Xoghayaha ARS Cumar Xaashi Aadan, C/shakuur C/raxmaan Warsame, Max'ed Max'ud Xayd iyo kuwo kale.

Siminaarka ay gudiyadan ku qaadan doonaan ayaa looga hadli doonaa dhinacyada horumarinta amaanka, xuquulqul insaanka iyo weliba dowlad wanaaga.

Ergayga UN-ka ee Somalia ayaa horay u sheegay in DF iyo ARS gudiyadoodu ay isku arki doonaan dalka South Africa si ay uga hadlaan howlaha horyaala, loona sii wado wadahadaladii Jabuuti.

Mucaaradka iyo DF ayaa waxaa weli u dhiman inay saxiixan qodobadii ay ku heshiiyen gudiyada ay dhisteen, iyadoo shirkii ay bishii hore ku yeesheen dalka Jabuuti uu burburay markii la isku khilaafay qodobka bixitaanka ciidamada Ethiopia.