Ugu yaraan 5-qof oo uu ku jiro guddoomiye ku xigeenkii Degmada Yaaqshiid ee Gobolka Banaadir Xasan Cilmi Abtidoon [Xasan Cadde] ayaa ku dhintay qarax xooggan oo maanta lala beegsaday gaari uu watay.

Mas'uulkaan ayaa waxaa la dhintay saddex ka tirsan ilaaladiisa iyo xaaskiisii, waxaana geerida mas'ulkaan saxaafadda u xaqiijiyay gudoomiyaha degmada Yaaqshiid Muxyadiin Xasan Jurrus.

Qarax lala helay gaariga u watay Xasan Cadde ayaa ahaa miino la geliyay wadada dhinaceda, waxaana uu qaraxan ka dhacay meel ku dhow Isgoyska Towfiiq ee Degmadaas.

Goobjoogayaal ayaa u sheegay Warsidaha Garowe Online in sidoo kale ay qaraxaas ku dhaawacmeen qaar ka mid ah ilaaladii guddoomiye xigeenka dhintay, kuwaasoo loo qaaday Isbitaalka Keysaney ee duleedka Muqdisho.

Baaburka la qarxiyey ayaa ahaa TOYOTA Cabdi-bile waxana gaaray burburay xooggan; iyadoo qaraxaan la rumeysan yahay inay ka dambeyeen kooxaha ka horjeda siyasadda DF, balse ma jirto cid sheegatay inay iyadu ka dambeysay.

Ciidamada Booliiska Degmada Yaaqshiid oo soo gaaray goobta ayaa waxay sameeyeen baaritaanno iyagoo kexeystay dad ay ka mid ahaayeen arday iskuul ku jirtay, waxaana dadkaas qaarkood lagu eedeeyay inay gacan ka lahaayeen qaraxa.

Agaasimaha guud ee Maamulka Gobolka Banaadir C/rashiid Ibraahim Max'ed oo saxaafadda kula hadlay xarunta maamulka Gobolka ayaa wacad ku maray inay gacanta kusoo dhigi doonaan kooxihii qaraxaas ka dambeeyay.

Guddoomiyaha Degmada Huriwaa Cumar Axmed Jacfaan oo ka hadlay shirkaas jaraa'id ayaa isaguna sheegay in qaraxan lagu dilay Xasan Cadde uusan gelinayn wax walwal ah oo ay howlahooda sii wadan doonaan inta dhammaantood la dilayo.