Dowladda Kenya ayaa iska fogeysay inay ka dambeysay xariga dad muslimiin ah oo u dhashay dalkeeda kuna xirnaa dalka Ethiopia mudo ka badan 1-sano, kuwaasoo lagu eedeeyay argagaxisonimo.

Afhayeenka xukuumada Kenya Alfred Mutwa oo war-saxaafadeed soo saaray ayaa sheegay in xukuumadiisu aysna wax lug ah ku lahayn xariga dadkaas iyo u gacangelinta dalka Ethiopia oo ay ku xirnaayeen.

"Dadkan waxaa u gudbinay Somalia; inagoo u haysanay inay Somali yihiin, halkaas ayaana looga gudbiyay Ethiopia, mas'uuliyadaasna inaga ma lihin" ayuu Mutwa ku yiri war-saxaafadeedkiisa.

Muslimiinta Kenya ayaa ku eedeynaya xukuumada dalkaas inay iyadu ahayd tii sida tooska ah dadkaas gacanta ugu gelisay Ethiopia; dadkaaasoo gaaraya 8-qof.

Dadkan dib loogu soo celiyay Kenya maalin ka hor ayaa waxay dhamaantood kasoo jeedaan gobolka xeebta ku yaala ee Mombassa, waxayna ka hadleen wixii ay kula kulmeen Ethiopia intii ay maxaabiista ahaayeen.

"Soo dhaweyn fiican ayaan kala kulanay Muslimiinta gobolkii aan ku xirnayn ee Ethiopia, waxaana su'aalo na weydiinayay saraakiil u dhashay dalalka Britain, Isreal, Mareykanka iyo sirdoonka Ethiopia" sidaa waxaa saxaafada u sheegay Saalim Cawad Saalim oo ka mid ah dadka la sii daayay.

Saalmi, wuxuu sidoo kale sheegay in katiinado lagu jeebeynayay oo mararka qaarkood loo hanjabayay, isagoo xusay in wax jirdillo ah aan loo geysan, balse ay jirtay cabsi-galin joogto ah.

"Ma jirin wax dambi ah oo aan galnay, dhibaatooyinka naloo geystayna ma ahayn kuwo aan mudnayn" ayuu saxafiyiinta u sheegay Saalim, isagoo mararka qaar hadalka hakinayay.

Sarkaal ka tirsan Ururka muslimiinta Kenya oo lagu magacaabo Al-Amin Kimanthe ayaa sheegay in dadkan la soo daayay ay xaq u leeyihiin inay dacweeyaan xukuumada, maadaama si khalad ah gacanta loogu geliyay dal shisheeye.

Culumo ka tirsan Muslimiinta dalka Kenya ayaa been abuur ku tilmaameen hadalka xukuumada Kenya ee sheegaya in dadkan loo maleynayay Somali, waxayna sidoo kale eedeeyeen war kasoo baxay dowlada Kenya oo sheegayay in dadkaan weli loo aqoonsan yahay argagaxiso.

Wadaadadan waxay sheegeen in hadalka xukuumada kasoo baxay uu yahay mid ay isku difaacayso, ayna ku qarinayaan inay khalad galeen, lana dacweeyo.