La haystayaasha Faransiiska ah ee lagu qabsaday doonida raaxada ee dhawaan lagu afduubay gacanka Cadan ayaa la hadlay gabadhoda, iyagoo u sheegay inay wanagsan yihiin.

Jean-Yves Delanne ayaa lagula hadalsiiyay gabdhiisa Alizée Delanne oo ku sugan Magaalada Tahiti ee dalka Faransiiska taleefoonada satellite-ka, waxayna sheegtay in aabaheed uu afka Faransiiska ku yiri: "Nous allons bien" oo macnaheedu yahay: "Waanu wanaagsanahay".

Alizée Delanne ayaa si weyn u darsaysay intii ay aabaheed la hadlaysay xaalada ay ku sugan yihiin isaga iyo hooyadeed, oo dhawaan lagu qabsaday doonida kuwa raaxada ah, taasoo lagu haysto xeebaha Eyl, waxayna xustay in waalidkeed ay nabad sheegeen ayna ku dul sugan yihiin doonida.

Gabadhan ayaa daboolka ka qaaday inay ula xiriir wayday aabaheed iyo hooyadeed lacag la'aan haysa awgeed, balse markii ay la hadashay ayay xustay inay weydiisay fariinta ay dirsanayaan, iyadoo jawaabta aabaheed argagax ka qaaday.

"Aabahay wuxuu ii sheegay in isaga iyo hooyaday ay kooxaha burcad badeeda ah ku haystaan doonida dusheeda, wuxuuna yiri wax walba way wanaagsan yihiin" ayay saxaafada u sheegtay Alizée; iyadoo intaas ku dartay:

"Cabsi weyn ayaa ila soo daristay, balse daganaan ayuu aabahay ii muujiyay, wuxuu sidoo kale ii sheegay in wax walba ay fiican yihiin, afduubayaashuna ay maqlayaan hadalkeeda".

Jean-Yves iyo xaaskiisa Bernardette Delanne waxay kooxaha afduubayaasha ah ku haystaan meel ku dhow Degmada Eyl, iyagoo ku afduubtay dooni raaxo oo laga leeyahay Faransiiska laguna magacaabo [Carré d'As IV] taasoo kasoo shiraacatay dalka Australia kuna sii jeeday Faransiiska.

Lamaanayaashaan isqaba ee lagu kala magacaabo Jean-Yves Delanne iyo Bernardette Delanne ayaa labaduba ah beeshin [Waayeel aan shaqeyn], iyagoo ka kala shaqeyn jiray Boostada iyo Bankiga, waxayna ku nool yihiin Magaalada yar oo lagu magacaabo Tahiti.