Guddoomiyaha Baarlamaanka DF Sheekh Aadan Max'ed Nuur
[Madoobe] iyo wafdi uu hogaaminayo ayaa maanta ka dhoofay Baydhabo isagoo u kicitimay Magaalada Nairobi ee dalka Kenya.
Sheekh Aadan Madobe iyo wafdigiisa ayaa waxaa kusii sagotiyay
garoonka Baydhabo xildhibaano ka tirsan baarlamaanka iyo maamulka
Gobolka Bay, mana jiraan wax hadal ah oo uu siiyay saxaafada.
Ilo wareedyo ku dhow gudoomiyaha Baarlamaanka ayaa sheegaya in
socdalka Sheekh Aadan Madoobe uu salka ku hayo ka qaybgalka shirkii ay
IGAD ku baaqday oo ka furmaya Nairobi
[Oct 27, 2008].
Gudoomiyaha baarlamaanka ayaa horay u sheegay inuusan waxba ka ogeyn
shirka ka furmkaya Nairobi waxa uu ku saabsan yahay, isagoo diiday in
DF la isku shaandheynayo.
Socdaalka gudoomiyaha baarlamaanka ayaa kusoo beegmaya iyadoo
dhawaan ay halkaas ka dhoofeen mudanayaal badan; halka mudanayaashii
harayna ay kulamo gaargaar ah ku lahaayeen Baydhabo, kuwaasoo aan la
garanayn ujeedadooda.
Urur Gobolkeedka IGAD ayaa lagu wadaa inay Madaxda DF iyo
mudanayaasha Baarlamaanka ay kula kulmaan Nairobi, iyadoo shirkaas
ujeedadiisa dhabta ah aan si cad loo baahin.
Garowe Online, Baydhabo
