Markab laga leeyahay dalka Malaysia oo nooca saliida xambaara ah ayaa
lagu afduubtay meel ka baxsan xeebaha Somalia, iyadoo la rumeysan yahay
inay afduubayaashu ahaayeen Somali.
Shirkadda markabka iska leh oo Malaysian ah ayaa sheegtey in uu ku socday dalka Holland, gaar ahaan Rotterdam, wuxuuna kasoo
shiraacday Jasiirada Sumatra ee dalka
Indonesian.
Markabka ayay shaqaalihiisu kala ahaayeen 29 Malaysian ah iyo 10
Filipinos ah, sida ay sheegtay shirkadda markabkaan iska leh, iyadoo
xusay inaysan jirin cid weli la soo xiriirtay.
"Burcadbaded aad u hubeysan ayaa markabka afdubay, waxaana la qafashey saacada 14:09, Aug 19, 2008. afduubayaashuna waxay ula
dhaqaaqeen goob aan la garanayn oo u dhexeysa Somalia iyo Yemen" ayaa
laga soo xigtay shirkadda Markabka iska leh.
Afdubayaasha ayaa inta badan sheegta lacago qaali ah, marka ay
hubsadaan inay markab gacanta ku dhingeen, taasoo walwal weyn ku haysa
shirkada.
Markabka ayaa waday saliid qumbe culeyskeedu gaarayo 32,000
tonnes, kaasoo qiimihiisa lagu qiyaasay $2.5 million, marka loo eego
qiimaha saliidan ay caalamka ka marayso.
"Waa Markabkii afaraad oo biyaha calaamka lagu afduubo Markab
bishaan oo qura" ayuu yiri Noel Chong oo ah madaxda hay'adaha badaha
caalamka ee International Maritime Bureau [IMB], kaasoo ku sugan Kuala
Lampur - Malaysia.
Mr. Noel Chong, ayaa intaas ku daray: "Waxaan ugu yeeraynaa UN-ka
inay talaabo deg-deg ah ka qaataan xaalada sii xumaanaysa ee afduubka
Maraakiibta".
Horay ayay dalalka Mareykanka, Faransiiska, Jarmalka, Britain,
Canada iyo Bakistaan u sheegeen inay wax ka qabanaayan burcad badeeda
sii xoogeysanaysa ee biyaha Somalia; balse ma jiraan weli talaabooyin
horay loo qaaday.
Garowe Online, Muqdisho
