Warar kasoo baxay xubin ka tirsan Maamul Goboleedka Puntland ayaa sheegay in mas'uuliyiinta Dowlada Puntland ay u balansan yihiin inay la kulmaan burcad-badeedka kuwasoo afduub ku haysta 10 markab degaanka Xeebta Eyl.

Md. Xasan Aloore oo ah Wasiirka Macdanta ee MG Puntland ayaa dhowaan booqasho howleed ku tagay Degmada Eyl isagoo uu wehliyo Taliye ku xigeenka Ciidanka Booliska Maxamad Xaaji Adan.

Gudoomiye kuxigeenka Degmada Eyl Md. Ali Ciire ayaa Radio Garowe u xaqiijiyay in guddiyo la magaacabay kuwasoo la kulmi doona burcad-badeedka si looga hortaago dagaal dhexmara maamulka iyo kooxaha marakiibta afduubka u haysta.

Wakalada wararka ee Reuters ayaa lagu baahiyey in burcad-badeedka Soomaaliyeed ay codsadeen lacag dhan $9 milyan oo doolar si ay u fasaxaan marakiibta ay gacanta ku hayaan.

Maamulka Puntland ayaa ku guuldaraystay wax ka qabashada burcad-badeedka iyadoo dadka degaanka Eyl ay sheegeen inaysan awoodin inay iska dhiciyaan kooxaha hubaysan.

Garowe Online, Garowe