Wararka
Qarax ka dhacay Baydhabo
By
Sep 11, 2008 - 8:20:04 AM

Hal qof ayaa ku dhintay 16-qof oo kalena waxaa kasoo gaaray dhaawacyo kala duwan qarax maanta ka dhacay Baydhabo, kaasoo lala bartilmaameedsaday ciidamo Booliis ah oo ku sugan suuqa digaaga.

Qofka dhintay ayaa ahaa rayid, iyadoo dhaawacyada ay isugu jireen rag iyo dumar, uuna ka mid ahaa askari ka tirsan ciidamadii qaraxa lala beegsaday, iyadoo dhaawacyada la dhigay Isbitaaka Baydhabo.

Goobta la weeraray oo ahayd saldhig yar oo ay ciidamadii dhawaan lagu soo tababaray dalka Ethiopia halkaas ku leeyihiin; ayay kooxhii falkaas qaraxa ah geystay goobta ka baxsadeen.

Howlwadeenada Isbitaalka Baydhabo ayaa sheegay in dhaawacyada lasoo gaarsiiyay ay qaarkood yihiin kuwo culus ayna dhamaantood seexiyeen isbitaalka, waxaana xirmay ganacsiga suuqa Baydhabo.

Weerarkaan ayaa ka dhigaya xaalada degmada Baydhabo ee xarunta Gobolka Bay mid aan la isku haleyn karin, iyadoo dhawaan halkaas lagu dilay xildhibaan Maxamed Cismaan Maye.