Ugu yaraan 4-qof ayaa ku dhaawacmay qarax xalay [July 4, 2008] ka dhacay Degmada Baydhabo ee Gobolka Bay, iyadoo qaraxaas lala beegsaday saldhig yare ku yaala degmadaas.

Dhaawacyada ayaa waxaa ka mid askari ka tirsan booliiskii ku sugnaa saldhigga la weeraray, iyadoo dadka kalena ay ahaayeen shibil halkaas marayay, waxaana gaartay saldhig-yarahaas booliis kale oo ka gurmayday saldhigga weyn ee Baydhabo.

Rasaas aad u badan oo ay fureen booliiska ayaan geysan wax khasaare nafeed ah, waxaana durba xirmay ganacsiga iyo isku socodka dadka iyo gaadiidka ee degmada Baydhabo, iyadoo dhaawacyada isla xalay la dhigay Isbitaaka Baydhabo.

Dhaqtarka Isbitaalka Baydhabo Dr. Timir ayaa saxaafadda u sheegay in laba ka mid ah dhaawacyada la gaarsiiyay Isbitaalka ay yihiin halis, balse si gaar ah uma tilmaamin laba ruux ee dhaawacyadoodau daran yihiin.

Qaraxan ayaa la rumeysan yahay inay ka dambeyaan kooxaha ka horjeeda siyasadda DF, iyadoo aanay jirin cid loo qabtay qaraxaas inay ka dambeysay ama ay ku lug lahayd.

Shacabka Baydhabo ayaa waxay sheegeen in qaruxu uu ahaa mid xooggan, loona adeegsaday bam gacameed, iyadoo xaaladdu ay saakay ahayd mid caadi ah, balse ay mar dambe ciidamo fara badan isku fidiyeen bartamaha Baydhabo.

Ciidamadaan ayaan la garanayn tallaabada ay qaadi doonaan, balse waxaa jira warar sheegaya inay baaritaanno ka sameyn doonaan gudaha Baydhabo, iyagoo raadinaya walxaha qarxa iyo xubno ka tirsan mucaaradka.