Xildhibaan Salaad Cali Jeelle ayaa sheegay in khilaafyada soo laalaabtay ee u dhexeeya madaxda DF ay yihiin kuwo ka dhashay maamul xumo iyo hogaan xumo.

"Ma jirto cid inkiri karta in khilaafaadyada soo laalaabtay ee u dhexeeya Madaxda DF ay yihiin nasiibdarooyinka lasoo gudboonaatay dowlada, balse lama dhahayo sidee u dhaceen; waase in waayo aragnimo laga qaato" ayuu yiri Salaad Cali Jeelle.

Xildhibaanka oo ku sugan Baydhabo ayaa sidoo kale xusay in madaxda DF looga fadhiyo inay noqdaan koox isku xiran oo dadka iyo dalka ugu shaqeeya si daacad ah, ayna iska daayaan is-fiirfiirsiga.

"Kulanka dhawaan ka dhacaya dalka Kenya oo ay ku baaqday IGAD, waa mid dib loogu eegayo waxqabadka DF, waayo dowladu waxay ku guuldareysatay inay wax qabto 4-tii sano ee ay jirtay" ayuu yiri Salaad Cali Jeelle.

IGAD, waxay ugu yeeraysaa Madaxda DF sidii ay talooyin iyo tusaale ugu biirin lahayd howlahooda, waayo IGAD ayaa qayb ka ahayd dhismaha TFG-da, waana fursad wanaagsan, waayo waxay cadeyn tahay buu yiri inaan Somalia la iloobin ayuu mar kale sheegay Jeelle.

Xildhibaan Jeelle wuxuu gaashaanka ku dhuftay in dowladu ay ku shaqeynayso dalka Kenya, taasna ay tahay sababta loogu yeeray, isagoo xusay in shir soconaya 3-maalmood loogu yeeray.

"Cid aan ogeyn ma jirto in waxqabadkii laga doonayay DF aanu muuqan, taas ayaana keentay in shirkan lagu baaqo, balse waxaan ku shaqeynaynaa dalkeena, mana ahan wax suurogal ah inaan ku shaqeyno dal kale" ayuu mar kale yiri xildhibaan Salaad Jeelle.