Garoonka kubadda cagta magaalada Garowe ee Mire Awaare ayaa waxa ka socda tartankii 6-aad ee gobollada Puntland,waxana galabta is-arag dhexmarey labada kooxood ee gobollada Sanaag iyo Cayn.

Ciyaartan oo ahayd mid xiiso gaar ah leh maadaama ay Jimce ahayd oo tageerayaashu soo buux-dhaafiyeen garoonka Mire Awaare kuwaasi oo u kala qaybsanaa hiilada kooxaha garoonka ku jiray.

Inkastoo qaybtii hore ee ciyaarta aan wax goolal ah la kala dhashan,haddana waxa jirey weeraro ay isweydaarsanayeen labada kooxood oo aan waxna ka badalin natiijadii lagu bilaabey kulanka.

Kadib nasasho iyo khidado cusub oo ciyaartoydu ka soo qaadatey tababarayashooda ayaa waxa dar dar iyo weerar aan kala joogsi lahayn la soo galay garoonka kooxda gobolka Sanaag oo muddo 10 daqiiqo gudaheed ah keensatay 3 gool.

Tarabuunka Mire Awaare ayaa waxa is–qabsadey sawaxanka taagerayasha Sanaag oo la dhacsanaa qaab ciyaareedka ay soo bandhigtey kooxdoodu,waxana niyad jab geliyeen 3-da gooli taagerayaasha Cayn oo qaarkood garoonka isaga baxay.

Xili la saadaalinayey in Sanaag ay sii wado gool dhalinta ayaa waxa ku baraarugey weerarka kooxda Cayn oo laba gool keensatey.

Rajada kooxda Cayn ayaa soo ficnaatey ee ay ka qabtey kulanka galabta ,balse waxa caqabad ku noqdey wakhtigii ciyaarta oo dhamaadey ka hor inta aysan u suuro gelin dhalinta goolka bareejada.

Sanaag 3-2 Cayn ayay ku soo idlaatey ciyaartii Mire Awaare ku dhexmartey labadii kooxood ee maanta dheelay,waxana beri siweyn loo sugayaa kulanka dhexmari doona Nugaal iyo Karkaar oo lagu tilmaamayo mid ka mid ah kulamada ugu xiiso badan tartanka gobollada Puntland