Gudoomiyaha Isbahaysiga ARS-Jabuuti Sheekh Shariif Sheekh Axmed oo ka mid ah murashaxiinta u taagan xilka Madaxweynenimo ee Somalia ayaa maanta casuumaad qado ah u sameeyay baarlamaanka Somalia.

Sheekh Shariif oo hadal kooban u jeediyay xubnaha uu qadada u sameeyay oo ka kooban kuwii hore iyo kuwa cusub inuu diyaar u yahay inuu dalka Somalia ka bixiyo dhibaatada hadii ay xilka u doortaan.

"Waxqabadkeyga waxaa lagu xusuusan karaa mudadii lixda bilood ahayd ee aan gacanta ku hayay bartamaha iyo koonfurta Somalia, waxaan furay garoonka Muqdisho iyo Dekeda oo muddo dheer xirnaa" ayuu Sheekh Shariif u sheegay mudanayaashii uu la hadlay.

Axmed Macalin Fiqi oo ah madaxa gudiga ololaha doorashada ee Sheekh Shariif ayaa saxaafada u sheegay in Sheekhu uu qoraalo ku aadan hadafkiisa iyo sawiradiisa uu u qaybiyay xubnihii uu casuumay.

Xaflada ayAa ka dhacday Hotel ku yaala xeebta badda cas, iyadoo dhamaan mudanayasha baarlamaanku ay kulanka goobjoogayaal ka ahaayeen, waxaana kaga dhawaaqay xaflada qadada inuu tanaasulaad sameeyay Xil. Jinni-boqor oo ka mid ahaa murashaxiinta xilka u taagan.

Sheekh Shariif oo daboolka ka qaaday in kulankan uu ahaa mid isbarasho ah oo dhexmarayay mudanayaasha labada dhinac, isagoo xusay inay si wadajir ah uga shaqeyn doonaan xaalada dalka.

Qado-sharaftan ayaa kusoo beegmaysa iyadoo lagu wado in maanta ay murashaxiintu hortagaan baarlamaanka si ay uga cadeeyaan mudanayaasha hortooda mowqifkooda siyaasadeed.

RADIO GAROWE