Shariif oo kula kulmay M. Zenawi 26 Jun 26, 2012 - 6:55:32 AM
Madaxweynaha Somalia Sh. Shariif Sh. Axmed ayaa xalay kulan la yeeshay Ra'iisul Wasaaraha Ethiopia Meles Zenawi kaasoo ay kaga hadleen xaalada ka jirta dalalka Soomaaliya iyo Ethiopia.
Kulankan oo qaaday Muddo saacado ah ayaa waxay labada mas'uul diirada ku saareen howlgalada ay ciidamada Ethiopia iyo kuwa DF ka wadaan gobolo ku yaalla Soomaaliya, kuwaasoo ay Al-shabaab ka taliso.
Ra'iisul wasaaraha Ethiopia ayaa wuxuu ugu hambalyeeyay Madaxweyanha Somalia horumarka ay dowlada Somalia ka sameysay dhinacyada Siyaasada iyo Amaniga, isagoo sheegay in dalkiisa ay ka go'an tahay caawinta Somalia.
Labada mas'uul ayaa waxay sidoo kale ka hadleen sidii labada dal ay isaga kaashan lahaayeen howlo lagu horumarinayo biyaha, korontada iyo dhismooyinka jidadka, waxaana labada mas'uul ay ku dhawaaqeen in Xiriirka Somalia iyo Ethiopia uu yahay mid adag.
Dalka Ethiopia ayaa waxaa kaga sugan Somalia Kumanaan Askari oo gacan siinaya kuwa DF oo kula dagaalamaya Al-shabaab deegaano kala duwan oo ku yaala bartamaha iyo Koonfurta Somalia.
Kulankan ayaa wuxuu imaanayaa xili Afhayeenka Dowlada Ethiopia uu sheegay inay ciidamadooda ku sugnaan doonaan inta laga dhisayo Dowlad Soomaaliyeed oo awood u leh inay iska caabiso Al-shabaab.
Madaxweyne Sh. Shariif ayaa maanta ka dhoofaya Addis Ababa isagoo kusii jeeda dalka Magaalada Dubai ee UAE oo uu kaga qaybgalayo shir looga hadlayo Arimaha Burcadbadeeda oo ay ka qaybgalayaan in ka badan 50-dowladood.
