Kulan looga hadlayey amniga iyo xaalufka deegaanada Gobolka Nugaal ee ka tirsan Dowladda Puntland ee Somalia ayaa maanta [Mar 16] ka dhacay xarunta gobolka ee magaalada Garowe.

Kulankan oo ay isugu yimaadaan Maamulka Gobolka Nugaal iyo masuulyiinta degmooyinka isla gobolkani iyo nabadoonada ayaa looga wada hadlayey sugida amniga iyo ka hortagida xaalufinta lagu hayo deegaanda iyo sido kale joojinta deegaanada cusub ee la deegaamaynayo lagana qodobayo baraagaha taasi oo caqabad wayn ku noqotay daaqsinka xoolaha iyo dhirta.
 
Kulankaan oo ay dalbadeen odayaal dhaqameedka Gobolka Nugaal ayaa nabadoanada goob jooga ahaa ay dhamaayeen 27-Nabdadoon waxaana madasha laysku waydaarsaday sida uga haboon ee maamulka iyo duubabaka dhaqanku ay isaga kaashan lahaayeen sugida amniga iyo ka hortagida xaalufka iyo horumarka.
 
Waxaa kulankaasi ugu horay ka hadlay Cabdirashiid Ciise Waayeel oo ku hadlayey magaca Dowlada Hoose ee Degmada Garowe oo nabadoonada ka codsaday in ay isku taagan hormarinta danaha guud ee Ummada maadaama ay door fiican ku leeyihiin dadwaynaha.
 
Gudoomiyaha Gobolka Nugaal Md. Cabdi Xirsi Cali (Qarjab) oo ay garab fadhiyeen qaar ka mid ah gudoomiyaasha degmooyinka isla gobolkani ayaa halkaasi ka  jeediyey khudbad ku qotontay ahmiyaha ay leedahay isku duubnida iyo in si wadareed looga hortago falalka dibin daabyada ku ah amniga iyo joojinta xaalufinta deegaanka, wuxuuna tibaxayn in ay talo ka sugayaan odayaasha dhaqanka.
 
Nabadoon Cabdilaahi Maxmed Aw'ciise oo ka mid ah nabadoonada kulankaasi goobjooga ahaa kuna hadlayey afka nabadoonada Gobolka Nugaal ayaa ku dhaliiyey maamulka gobolka in aysan si wayn isugu howlin arrimaha xaalufinta deegaanka iyo joojinta goobaha cusub ee la degaamaynayo dhowr jeer oo horana ay u soo gudbiyeen maamulka waxaa uu nabadoonku ka codsaday Maamulka Goboka Nugaal iyo Gudoomiyaha Degmoyinka in howshaasi loo guntado.

GAROWE ONLINE