Golaha amaanka ee UN-ka ayaa aqbalay qoraal ciidamo nabad ilaalin ah loogu raadinayo Somalia oo uu keenay Mareykanka, balse waxay codeyntiisa dib u dhigeen ilaa [June] sanadkan.

Qaraarka Mareykanka ayaa dhigayay in si deg-deg ah loo dirto si looga hortago amaanka Somalia oo xumaada, iyadoo qaraarkaan uu noqonaya kii ugu dambeeyay ee xukuumada Bush ay soo hordhigtay golaha amaanka ee UN-ka.

Ciidamada loo raadinayo Somalia ayaa la sheegay inay ilaalin doonaan xarumaha DF, saraakiisha dowlada, goobaha muhimka ah sida isbitaalka, dekeda iyo garoonka diyaaradaha.

UN-ka ayaa ka codsaday Midowga Afrika inay kordhiyaan tirada ciidamad ka jooga Somalia, iyadoo xili joogistooda lagu daray lix bilood oo cusub, maadama ay Ethiopia ka baxday Somalia.

"Somalia kama jirto nabad la ilaaliyo" ayuu horay u sheegay xoghayaha guud ee Qaramada Midoobay Ban Ki Moon oo hadal u jeedinayay golaha amaanka, waxaase uu sheegay in UN-ku uu taageero buuxda siinayo AMISOM.

Mareykanka ayaa ku cadaadinaya UN-ka inay sida ugu dhaqsiyaha badan u dhisaan ciidamo nabad ilaalin ah oo loo diro Somalia, si aan loo dayicin dalka geeska Afrika ku yaalla [Somalia].

Safiirka France ee UN-ka Jean-Maurice Ripert ayaa ka sheegay xarunta UN-ka in qorshaha diyaarinta ciidamo nabad ilaain ah oo loo diro Somalia la fulinayo, balse loo baahan inay in indhaha lagu hayo Somalia.

Zalmay Khalilzad oo ah wakiilka US ee UN-ka oo shaqadiisu dhamaanayso ayaa codsaday in ciidamada AMISOM la siiyo qalab, si ay ugu guulaystaan mudada la qabtay ka hor inay xasiliyaan dalka.
 
Garowe Online, Muqdisho