Xasan oo ka hadlay dilka Suxufiyiinta 10 Nov 10, 2012 - 5:57:23 AM
Madaxweynaha Somali
Xasan Sh. Maxamuud ayaa sheegay in la sameynayo Gudi baaris ku sameeya
dilalka loo geysto Suxufiyiinta Somalia, kadib kulan uu Villa Somalia
kula yeeshay qaar ka mid ah qaybaha kala duwna ee Suxufiyiinta ka
howgala Muqdisho.
Xasan Shiikh wuxuu sheegay in DF aysan u dulqaadan doonin dilalka
macnodarada ah ee loo geysanayo Suxufiyiinta ka howlgala warbaahinta
guud ee dalka ka jirta, gaar ahaan kuwa ku sugan Muqdisho.
"Uma dulqaadan doono in la dilo wariye kale, waxaan ka codsanaynaa
shacabka inay gacan ka geystaan sidii loo qaban lahaa dambiilayaasha ka
dambeeyay dilalka loo geysto suxufiyiinta" ayuu yiri Xasan Shiikh oo la
hadlayay koox wariyeyaal ah.
Suxufiyiinta uu la kulmay Madaxweynaha ayaa waxaa ku jiray kuwo saacado
badan ku xayirnaa garoonka diyaaradaha ee Kismaayo, kuwaasoo maamulka
halkaa ka jira uu u diiday inay gudaha u galaan Magaaladaas oo ay howlo
shaqo ugu socdeen.
Wariyeyaasha Sanadkan lagu dilay gudaha Soomaaliya ayaa waxay tiradoodu
maraysaa 18, kuwaasoo intooda badan lagu dilay Magaalada Muqdisho,
waxaana kula jira sadex wariye oo ka howlgalayay Idaacada Shabelle oo ka
mid ah kuwa ka howgala Muqdisho.
Ma jirto cid loosoo qabtay dilalka Suxufiyiinta loo geysto, waxaana
dilalka 10 ka mid ah wariyeyaashii sanadkan la dilay mas'uuliyada
sheegtay Al-shabaab oo DF kula jirta dagaal, waxaana wariyeyaashii la
kulmay Xasan Shiikh qaarkood ay rajo xumo ka muujiyeen hadalkiisa.
Madaxweynah Somalia ma uusan sheegin xiliga uu gudiga dabagalka ku
sameynaya dilalka wariyeyaasha magacaabi doono; iyadoo inta badan
madaxda Soomaalidu ay sheegaan inay wax qabanayaan marka la dilo wariye.
