AKHRI: [ Qoraalka kooxaha mucaradka]
Qoraal uu maanta kasoo saaray xafiiskiisa Nairobi
isku duwaha howlaha gargaarka aadamnimo ee Somalia Mr. Mark Borden ayuu
ku sheegay in xaaladda amaan ee Somalai ay ka sii darayso, ayna ka
walaacsan yihiin shaqaalaha gargaarka ee ku sugan gudaha Somalia.
Mr. Borden, wuxuu walaac ka muujiyay dilalka lala beegsanayo
shaqaalaha gargaarka ee ku sugan Somalia iyo kuwa NGO-yada oo uu
sheegay in si bareer ah loo tooganayo, wuxuuna sidoo kale soo hadal
qaaday shacabka ka lalaynayo.
"Shaqaalaha gargaar ee lagu dilay sanadkaan oo keliya gudaha Somalia
waxay gaarayaan 19-qof, waxaana loo toogtay si axmaqnimo ah" ayuu
warsaxaafadeedkiisa ku sheegay Mr. Mark Borden.
Xiriiriyaha UN-ka u qaabilsan howlaha gargaar aadamnimo ee Somalia
Mark Borden, ayaa yiri: "Waa mid aan suurogal ahayn in shaqaalaha
gargaarka ee UN-ku ay u adeegaan dadka baahan ee xaaladaha aadanimo ay
haystaan, maadaama la beegsanayo".
"Sidoo kale waxaan ka walwalsannahay kororka rabshadaha ka jira
Somalia oo aad u batay sannadkaan oo keliya, iyadoo tacadiyo kala duwan
loo geysanayo dadka rayidka ah" ayuu yiri Mr. Borden.
Hadalka Mark Borden ayaa kusoo beegmaya iyadoo maanta ay ka
dhaceen mudaaharaadyo ay dhigeen dadka ku barakacay daafaha Muqdisho
gaar ahaan jidka isku xira Afgooye iyo Muqdisho; kuwaasoo ka cabanayay
dilalka iyo afduubyada lagu hayo shaqaalaha gargaarka.
Dhinaca kale waxaa warsidaha GO soo gaarey qoraal kooxaha mucaaradka ah u direen hay'adaha QM ee ka howlgala Somalia iyada oo aysan cadeyn sababta xafiisyada ay Nairobi ku leeyihiin digniintaan ugu gudbin waayeen dadka Somalida ah ee lagu diley Muqdisho iyo gobolda kale ee dalka.
Garowe Online,Muqdisho
