Tech & Web
AU oo kordhinaya kaalinta Hawenku ku leyihiin Sayniska
By
Sep 5, 2007 - 10:12:55 AM

Shir ay soo qabanqaabiyeen Midowga Africa oo ah kii ugu horreeyey ee noociisa ah,   oo looga hadlayey kaalinta ay haweenka Africa ku leeyihiin culuumnta sayniska iyo tiknoolajiyada, ayaa toddobaadkii hore ka furmay magaalada Johansberg ee dalka KoonfurAfrica.

Shirkan oo saddex maalmood soconayey, ayaa waxaa ka soo qayb galay dumar khubaro ku ah culuumta sayniska iyo tiknoolajiyada, kuwaasoo ka doodayey sidii ay uga qayb qaadan lahaayeen horumarka Africa.

Botlehale Pema, oo xagga arrimaha Africa kala talisa Wasaaradda Sayniska iyo Tiknoolajiyada ee dalka Koonfur Africa, ayaa shirkaas uga warrantay wariyaha qaybta Africa ee VOA-da, waxayna tiri:

“Shirku wuxuu isu keenay saynisyahanno ka kala yimid 53-da dal ee ka tirsan Midowg Africa. Ujeedada laga leeyahayna waxay tahay in loo kuur galo waxyaabaha ka hor taagan dumarku in ay kaalin wax ku ool ah ku yeeshaan xagga sayniska iyo tiknoolajiyada, kadibna la helo qorshe dhibaatadaas xal loogu raadinayo,” ayeey tiri Pema.

Isku dheelli tirnaasha la’aan jirta

Botlehale waxay sheegtay in, inkastoo shirku yahay kii ugu horreeyey ee noociisa ah, haddana uu Midowga Africa waayadan dambe daraasadaynayey isku dheellitirnaansha la’aanta dumarka ka haysata dhanka sayniska iyo tiknoolajiyada.

“Shir madaxeedkii bishii January ee looga hadlayey horumarka xagga sayniska iyo tiknoolajiyada ayaa goo’aannada lagu gaaray waxaa kamid ahaa in la kordhiyo dumarka iyo dhallinyarada barata sayniska iyo tiknoolajiyada. Sidaas awgeed, shirkani waa mid sii amba qaadaya kii hore. Waxaan ugu baaqnay dhamaan haweenka African-ka ah, ee ku takhasusay sayniska iyo tiknoolajiyada, ineey isku yimaadaan oo ka hadlaan arrinkan,” ayeey tiri Pema.

Inkastoo haweenku ay yihiin kala bar oo bar dadka ku dhaqan Africa, haddana dhinac walba marka la eego weey ka liittaan ragga, gaar ahaan xagga sayniska iyo tiknoolajiyada.

“Waxeey ila tahay inaan marka horeba la’anahay hannaankii aan ku tirakoobi lahayn haweenka ka shaqeeya sayniska iyo tiknoolajiyada. Laakiin guud ahaan, marka la eego dalka Koonfur Africa oo kale, 36% dadka sayniska iyo tiknoolajiyada ka shaqeeya waa dumar. Sidaas awgeed, waxaan dareensannahay in xoogga la saaro oo cilmi baaris badan lagu sameeyo caqabadaha jira, si markaas loo abuuro mashruucyo wax looga qabanayo,” ayeey tiri Pema.

Kaalinta haweenka waxbartay

Qabanqaabiyayaasha shirku waxeey kaloo ku rajjo weyn yihiin ineey helaan haween African ah, oo ku takhasusay sayniska iyo tiknoolajiyada, oo ay ku dayan karaan gabdhaha doonaya ineey maaddooyinkaas bartaan.”

“Haweenka lagu marti qaaday shirkan ayaa ah kuwa ku dayasho mudan, maxaa yeelay waxeey guulo ka soo hooyeen meelo lagu hoobtay. Waxaan ku rajo weynahay ineey haweenkani dalkooda ku laabtaan oo ay hirgaliyaan mashaariicda laga hadlay, isla markaana ay dhalinyarada dhiiri galiyaan oo ay aasaasaan ururro xagga sayniska iyo tiknoolajiyada ah oo ay haweenku leeyihiin,” ayeey tiri Pema.

Bolthale waxeey sheegtay inuusan wali wakhtigii ka dhamaan qaaradda Africa, si arrinkan waxa looga qabto. Waxeey sheegtay in Midowga Africa uu guud ahaan arrimaha horumarka ahamiyad gooni ah siin doono, laakiin haweenku ay noqonayaan kuwa si gaar ah muhiim ugu ah hormarka qaaradda Africa.

Waxeey intaas raacsiisay in Midowga Africa uu isla meel dhigay in horumarka xagga sayniska iyo tiknoolajiyadu ee qaaradda Africa ay tahay in si weyn wax looga qabto. 

Xigasho/VOA-Partenrs with RG