Wararkii ugu dambeeyay degmada Qandala
-
- Posted On 05-12-2016, 08:03PM
BOSASO, Puntland- Ciidamada Puntland, ayaa kusii dhawaanaya degmada Qandala ee gobolka Bari, halkaas oo muddo ka badan bil ay haystaan mallayshiyaad sheegtay inay taabacsanyihiin kooxda Argagixisada ah ee Daacish.
Iska horimaadyo goosgoos ah ayaa wararku sheegayaan inay labada dhinaca ku dhexmaray dhulka buuralayda ah ee Koonfurta kaga beegan magaalada Qandala.
Wararku waxay intaas ku darayaan in ciidamada difaaca Puntland maanta gacanta ku dhigeen goob fariisin u ahayd maleeshiyada Daacish.
Dagaalkii goos gooska ahaa, ayaa lagusoo waramayaa inuu hakaday, ciidamaduna wadaan qorshe horay ugu sii soconayaan iyagoo baaritaan kuwada goobaha buuraha ah iyo sidoo kale waddooyinka gala Qandala.
Lama oga khasaaraha ka dhashay dagaalkii maanta, balse waxaa lagusoo waramayaa inay xaaladdu iminka dagantahay.
Saraakiisha ciidamada Puntland ayaa GO u sheegay in gaari nooca raaxada ah oo la sheegay inay lahaayeen kooxdaasi maanta gacanta lagu dhigay.
Tafaasiil dheeraad ah lagama bixin sida loo qabtay iyo waliba halka uu ku socday xilliga ciidamada gacanta ku dhigeen.
Isgarsiinta ayaa wali ka maqan degmada Qandalada iyo nawaaxigeeda, waxaana adag in xiriiro toos ah lala yeesho ciidamada qalabka sida iyo dadka deegaanka ee halkaas ku sugan.
Ilaa hadda majirto wax war ah oo kasoo baxay dhinaca dowladda iyo saraakiisha ammaanka.
Goor sii horaysay taliyaha ciidamada Badda ayaa sheegay in 50KM oo qura ay u jiraan degmada Qandala ee gobolka Bari.
GAROWEONLINE
