Ciidamado Howlgal dad badan lagu soo qabtay ka fuliyay Burhakabo
BUUR-HAKABO, Somalia- Toboneeyo qof ayaa lagu qabtay howlgal ay ciidamada dowladda Federaalka Somalia iyo AMISOM ay ka sameeyeen degmada Buurhakabo ee gobolka Baay.
Saraakiisha maamulka degmada ayaa sheegay in ciidamada ay baaritaanno ku sameeyeen xaafado kala duwan, islamarkaana ay qabteen dad lala xiriirinayo Al shabaab.
Ciidamada SNA iyo kuwa AMISOM ayaa xiray wadooyinka waawayn, xilliga uu socday Howlgalka baaritaanada xaafadaha iyo Gaadiidka dadweynaha kala duwan.
Col Maxa'ed Isxaaq, oo ah sarkaal sare oo katirsan Booliska Buurhakabo ayaa u sheegay GO in dadka ay soo qabteen su'aalo ku waydiinayaan saldhiga degmada, ciddii dambi lagu helana maxkamad lasoo taagi doono.
Taliyaha ayaa sheegay inay socon doonaan howgallada noocan ah, si ay u sugaan amniga, kadib markii dhawaan lagu dilay Madax sare oo uu kamid yahay Gudoomiyaha maamulka Degmada.
Kooxda Al shabaab ayaa mudooyinkii dambe xoojiyay weerareeda kala duwan, ee Koonfurta Soomaaliya, si ay u carqaladayso Doorashada socdo.
GAROWEONLINE