Somalia: Tababar loo soo xiray Ciidamo Kumaandoos ah [Sawirro]
MUQDISHU, Somalia - Wasiirka Gaashaandhigga Somalia Cabdirashiid Cabdullaahi Maxamed ayaa maanta tababar ugu soo xiray Muqdishu boqolaal askari cusub oo kamid ah ciidamada xoogga dalka.
Ciidamadan oo gaaraya 400 oo askari, ayaa tababar u socday mudo lix bilood ah, waxaana siinayay saraakiil u dhashay Dalka Imaaraadka Carabta, oo ku sugan xero ku taalla nawaaxiga Tarabuunka.
Wasiirka warfaahinta Cabdiraxmaan Yarisow, wasiirkii hore ee difaaca Gen Diini, Safiirka Turkiga iyo madax kale ayaa ka qeybgalay munaasabadda loo qabtay ciidamadan oo katirsan Guutada Danab iyo Militariga Somalia.
Xafladda waxaa sidoo kale goobjoog ahaa madax ka socotay Imaaraadka, oo uu kamid yahay ku xigeenka safiirka dalkaasi, oo goobta ka sheegay inay sii wadi doonaan tababarka ciidanka xoogga dalka (SNA).
Cabdirashiid ayaa xusay inuu ku faraxsanyahay Tababarka loosoo Xiray ciidamada Kumaandooska ah ee Dowladda Imaaraadka, isagoo kula dardaarmay inay difaacaan dalka iyo shacabka.
Madaxweynaha Somalia Maxamed Cabdullaahi Farmaajo ayaa dhawaan ku dhawaaqay xaalada dagaal ka dhan ah Al Shabaab, isagoona sheegay in ciidanka xoogga ay qaadi doonaan duulaan kooxdaas lagu dabar goynayo.
Dowladda Imaaraadka ayaa sanado kahor ka dhistay Muqdishu xero tababar oo aad u ballaaran, taasi oo tababar lagu siiso ciidamada kala duwan ee Somalia, gaar ahaan Kumaandooska iyo Militariga.
GAROWEONLINE