Somalia: Wasiirrada Waqtigu ka dhammaaday oo qodobo kasoo saaray duqayntii gobolka Mudug
MUQDISHU, Somalia- Shir golaha wasiirrada Somalia ee waqtigoodu idlaaday ku yeesheen magaalada Muqdishu caasumadda Somalia, waxay kaga hadleen duqayn labo maalin kahor ka dhacday Bariga xarunta gobolka Mudug ee Galkacyo.
Duqayntaas ayaa dood xoog leh dhalisay, kadib markii Galmudug sheegtay in la weeraray saldhig ciidamadoodu ku sugnaayeen, inkastoo Maraykanka iyo Puntland si cad u tilmaameen in howlgalkaas lagu qaaday koox katirsan Al Shabaab oo isku aruursanaysay deegaano katirsan nawaaxiga Galkacyo.
Balse, waxaa arrintaasi maanta ka fariistay wasiirrada Somalia, waxayna la safteen dhinaca Galmudug iyagoo cambaareeyay weerarkii dhacay islamarkaana xukuumadda Washington ka codsaday inay faah faahin waafi ah ka bixiso duqayntii la fuliyay Habeenkii Arbacada.
Golaha xukuumaddu, waxay sheegeen inay sameeyeen Guddi wasiirro ah kuwaasoo loo xilsaaray inay baaraan dhacdada Galkacyo iyagoo tacsi u diray shacabka iyo maamulka Galmudug.
Waxay ku baaqeen in la dajiyo xiisad ay sheegeen inay u dhaxayso maamulka Puntland iyo Galmudug.
Duqayntan ayaa lamid ahayd mid diyaaradaha Maraykanku ka fuliyaan gobollo kamid ah dalka Somalia, kuwaasoo lala beegsado saldhigyo Al Shabaab ku suganyihiin.
HOOS KA AKHRISO QORAAL KASOO BAXAY SHIRKII GOLAHA WASIIRRADA WAQTIGOODU DHAMMAADAY EE SOMALIA
GAROWEONLINE