Askari Kenyan ah oo la'yahay kadib weerar ka yimid Al-Shabaab

Afrika
By WARIYAHA NAIROBI , GAROWE ONLINE
Duulaanka oo uu ka dhashay weerar fool ka fool ah ayaa lagu waramayaa in uu geystay khasaaro naf iyo maal leh.

NAIROBI, Kenya – Mas'uuliyiinta dowladda waddanka Kenya ayaa waxay xaqiijiyeen in dagaalameyaal ka tirsanaa Al-Shabaab ay weerar culus ka geysteen gudaha dalkaasi dhaca Geeska Afrika.

Duulaanka oo uu ka dhashay dagaal fool ka fool ah oo ka dhex-maray dableyda iyo ciidanka Kenya ayaa ka dhacay degaanka Lafey ee ismaamulka Mandera.

Inta la xaqiijiyey hal ruux ayaa ku dhaawacmay iska hor-imaadka oo la sheegay in uu socday muddo dhowr daqiiqado ah.

Saraakiisha ammaanka ayaa tibaaxay in sidoo kale xoogaga Al-Shabaab ay burburiyeen anteenadda shirkad isgaarsiin oo aysan shaacin magaceeda.

Ruuxa dhaawaca ah oo haatan lala tacaalayo xaaladiisa caafimaad ayaa magaciisa lagu sheegay Isaaq Cabdi Buulle, oo ah macalinka dugsi qur'aan.

Wararka ayaa intaasi ku daraya in hal askari oo boolis ah ilaa iyo haatan la la'yahay kadib dhacdadan, oo aysan wali war kasoo saarin Al-Shabaab.

Maamulka maxaliga ah ee tuuladda ayaa waxay dowladda dhexe ee Kenya ka dalbadeen in ay kala shaqeyso baadigoobka askariga la la'yahay.

Tan iyo markii ciidamada Kenya ay soo galeen Soomaaliya sanadkii 2011-kii, Al-Shabaab oo gudaha dalkaasi guuto ka sameysatay ayaa weeraro ay ku naf-waayeen boqolaal shacab u badan ku dishay.

GAROWE ONLINE