Rag loo haystay weerarkii Jamaacada Garissa oo dambiga lagu helay

Afrika
By WARIYAHA NAIROBI , GAROWE ONLINE
Shaqsi kale ayaa xorriyadiisa loo celiyey markii wax dambi ah lagu waayey | Xuquuqda Sawirka: Daily Nation

NAIROBI, Kenya – Saddex rag ayey ku cadaatay gal-dacwadeed la xiriira weerarkii geerida badan keenay ee Jamaacadda Garissa ee dalka Kenya ee dhacay April 2015-kii.

Rashid Charles Mberesero, Maxamed Cali Abiikar iyo Xasan Edin Xasan ayaa lagu helay in ay qeyb ka ahaayeen dableyda dishay ku 148 qof ee ardayda u badnaa.

Shaqsiyaadkan ayaa waxaa sidoo kale ku cadaatay in ay ka tirsanaayeen dagaalameyaasha hubeysan ee Al-Shabaab, kuwaasi oo fadhigoodu yahay Soomaaliya.

Ruux kale, Sahal Diiriye Xasan, ayaa lasii daayey markii wax dambi ah ay ku weysay maxkamadda ku taala Nairobi, sidda ay ku warameyso warbaahinta.

Wargeyska Daily Nation ayaa wuxuu ku waramayaa in maxkamada ay xukun ku ridi doonto xubnahan dambiga lagu helay 13-ka bisha Julaayo ee sanadkan 2019.

Xaruntaasi waxbarasho ee ay ku duushay kooxda gacansaarka la leh shabakadda Al-Qaacida ayaa waxay ku taalaa Waqooyi Bari dalka dhaca Geeska Afrika.

Dhacdadaasi ayaa ahayd tii ugu dhimashada badneyd taariikhda Kenya kadib weerarkii Al-Qaacida ee safaarada Mareykanka ee 1998-dii, halkaasoo lagu khaarijiyey 200 ruux.

GAROWE ONLINE

Wararkii ugu dambeeyey