Askari saaxiibkiis ku toogtay Muqdisho oo gacanta lagu dhigay
MUQDISHO, Soomaaliya – Iyadoo dilalka ay ku lug-yeeshaan askarta ay kordheen, fal kale oo naxdin ah ayaa laga soo wariyey degmada Dharkeenlay ee magaalada caasimada ah ee Muqdisho.
Habeenimadii Talaadada, 28-ka Janaayo, 2020, askari ayaa la sheegay in uu xaafada Kaawo Godey ku dilay wiil ay saaxiibo ahaayeen kaasoo magaciisa lagu soo gaabiyey Munasar.
Toogashada ayaa ka dhacday goob bulsho ah, sidda ay sheegeen goobjoogeyaal kala duwan oo meesha ay ka dhaceen ka akdhowaa.
Illaa iyo haatan ma cadda sababta dhabta ah ee ka dambeysa khaarijinta oo lagu tilmaamay in ay ahayd mid ku dhacday "si lama filaan ah".
"Marxuumka wuxuu askariga, oo ay saaxiibo ahaayeen, isugu duubay si kalsooni leh isagoo kaga yimid gedaal," ayuu yiri goobjooge ka gaabsaday magaciisa sababo ku aadan in uu u baqayo naftiisa.
Wuxuu ku daray: "Kadib askariga wuxuu lasoo baxay Bastoolad, isagoo aan hubsan qofkuu yahay ayuu xabada ku dhuftay isla meesha ayuuna ku geeriyoodey".
Warbaahinta maxaliga ah ayaa ku warantay in ciidamo ka tirsan Dowladda Federaalka oo meesha ay wax ka dhaceen tagay ay xireen askariga, oo wajahaya su'aalo waydiin.
Munasar, oo ahaa wiil dhalinyaro ah isla markaana ku biiray liiska da'yarta ku baxay gacanta ciidamada qalabka sidda, ayaa la tibaaxay in uu ka shaqeynaayey Maktabad lagu iibiyo Buugaagta.
GAROWE ONLINE