Ciidamadda Soomaaliya oo lagu qarxiyey Muqdisho; khasaaro jira
MUQDISHO, Soomaaliya – Fahfaahino dheeraad ah ayaa waxay kasoo baxayaan qarax miino oo Talaadada maanta ka dhacay wadada Jamhuuriya, degmada Kaaraan ee caasimadda Soomaaliya ee Muqdisho.
Bartilmaameedka weerarka ayaa waxaa lagu sheegay gaari ay la socdeen askar ka tirsan milatariga oo goobtaasi marayey.
Ugu yaraan afar qof ayaa lagu waramay in ay ku dhaawacmeen falkaas aysan jirin koox dusha saaratay mas'uuliyaddiisa.
Sawirro laga soo qaadey meesha ay wax ka dhaceen oo lagu faafiyey baraha bulshadda ayaa muujiyey burbur soo gaarey goobo ganacsiyo gaadiid u badan mootada loo yaqaano Bajaajta.
Wararka ayaa intaas ku daraya in badi dadka dhaawacmay ee xaaladooda caafimaad lagula tacaalayo isbitaalada ay yihiin shacab gaar ahaan ganacsato mehrado ku lahaa goobtaas.
Ururka Al-Shabaab ayaa inta badan looga bartay falalka liddiga ku ah nabad-gelyadda ee ka dhacay koonfurta iyo bartamaha Soomaaliya, wallow ay xiliyada qaar ay dalalka deris ka howlgalkaan.
Dhacdadaan ayaa kusoo aadeysa xilli magaalada lagu soo rogay bandow habeenkii ah sababo la xiriira ka hortagga faafitaanka fayruska Corona, kaas oo kiisaska laga xaqiijiyey dalka ay gaarayaan 60 [lixdan].
GAROWE ONLINE