Farmaajo oo amar dul-dhigay Wasaaradaha XF Soomaaliya
MUQDISHO, Soomaaliya – Madaxweyne Farmaajo ayaa ku amray Wasaaradaha xukuumadda federaalka ah in ay xakameeyaan waxyaabaha dibadda laga soo dhoofiyo ee dalka laga heli karo.
Hadalkan ayaa wuxuu ka sheegay munaasabadda daah-furka Qorshaha 9-aad ee Horumarinta Qaranka oo Isniinta maanta ah lagu qabtay Madaxtooyadda.
Qorshahaan oo ay diyaarisay Wasaaradda Qorsheynta iyo Horumarinta Qaranka ayaa ku saleysan; amniga iyo siyaasadda, kobcinta dhaqaalaha, deegaanka iyo horumarinta bulshada.
Farmaajo ayaa waxyaabaha dalka laga heli karo ee dibadda laga soo dhoofiyo ku tilmaamay "dhibaato jilbaha dhulka u dhigey" dhaqaalaha waddanka.
"Waxaa lagama maarmaan ah in aan u babac-dhigno xal u helista dhibaatooyinka soo noq-noqday ee jilbaha u dhigay dhaqaaleheenna iyo wax-soosaarkeenna," ayuu yiri.
Wuxuu ku daray: "Waxaan farayaa Wasaaradaha gaar ahaan Wasaarada Maaliyadda xakameynta waxyaabaha dibadda nooga yimaada ee dalkeena awooda u leeyahay in uu soo saaro".
Soomaaliya ayaa dhowaan markii ugu horeysay muddo sanado ah kadib waxay dib u bilowday dhoofinta muuska, iyaddoo ay jiraan wax-soo-saar kale oo suuqyadda caalamka loo iib-geeyo.
Qorshaha Horumarinta Qaranka ee Dowladdu ay ku shaqeyn doonto 5-ta sano ee soo socota ayaa la jaan-qaadaya barnaamijka deyn cafinta Soomaaliya oo heerarkii ugu dambeeyay maraya.
MUUQAALKA FARMAAJO
GAROWE ONLINE