Murashaxiinta Guddoonka Barlamanka Somalia oo maanta jeediyay khudbado
MUQDISHU, Somalia- Musharaxiinta u taagan xilka Guddoomiyaha Barlamanka Somalia iyo ku-xigeenadiisa ayaa maanta Golaha shacabka ka hor jeediyay Khudbadahooda wax-qabad iyo Taariikh nololeedkooda.
Afar kamid ah xubnaha u taagan kursiga Guddoomiyaha golaha Wakiillada, ayaa jeediyay khudbadahooda ay uga hadlayaan waxqabadkooda soo socday, waxayna si midaysan u sheegeen inay qaab hufan ugu adeegi doonaan bulshada Somalia.
Maxamed Sheekh Cusmaan Jawaari oo mar kale booskan u sharaxan, ayaa sheegay inuu yahay murashax aan ku socon siyaasad qof ama koox, wuxuuna golaha shacabka ka hor sheegay inaysan jirin cid uu wato.
Booska Guddoomiyaha, waxaa u taagan Xildhibaanada kala ah;
1) Maxa'ed Sheekh Cusmaan Jawaari
2) Cabdirashiid Maxa'ed Xidig
3) Cabdifitaax Ibraahim Geesey
4) Idiris Cabdi Dhakhtar.
Booska Guddoomiye ku-xigeenka 1-aad waxaa u taagay Mudanayaasha kala ah;
1) Cabdiwali Sheekh Ibraahim Muuday.
2) Farah Sheekh Cabduqaadir.
3) Jeylaani Nuur Ikar Sheekh Suufi
4) Khadiija Maxamed Diiriye
5) Khalid Macow Abdulqadir
5) Saciid Xuseen Iid.
Musharaxiintan ayaa soo bandhigay waxyaabaha ay qaban-doonaan haddii la doorto, waxaana ay ka codsadeen Xildhibaanada cusub inay codadkooda siiyaan.
Gudiga Doorashada Gudoonka Barlamanka ayaa tilmaamay in 11-ka Musharax oo u taagan Gudoomiye ku xigeenka 2-aad, ay Berri jeedin doonaan Khudbadahooda.
Maalinta Khamiista ee soo socoto (11-12-ka January, 2017), ayaa la filayaa inay dhacdo Doorashada Gudoonka Baarlamaanka Somalia.
Doorashadan ayaa ka duwan middii hore, waxaana mooda inay aad uga badantahay tirada Xildhibaanada doonaya booskan kuwii Sharaxnaa Sannadkii 2012.
GAROWEONLINE