Qarax gaari oo ka dhacay kontarool ku dhow madaarka Muqdisho

Soomaliya
By WARIYAHA MUQDISHO , GAROWE ONLINE

MUQDISHO, Soomaaliya - Qarax ka dhashay gaari ayaa lagu waramayaa in uu ka dhacay isgoyska KM4 ee bartamaha magaalada Muqdisho, caasimada dalka Soomaaliya.

Jugta qaraxa oo Uuro iyo qiix ka dhashay qeybo kamid ah magaala madaxda laga arkay ayaa dhawaqiisa laga maqlay degmooyinka ku teedsan isgoyskaasi mashquulka badan.

Warar horudhac ah ayaa sheegaya in weerarka uu ka dhacay bar kontarool oo ay aasgaasi ku leeyihiin ciidamadda dowladda federaalka ah, halkaasi oo ay gaadiidka ku hubiyaan.

Kontaroolka oo ciidamo boolis ah ay joogaan ayaa kamid ah goobaha laga ilaaliyo ammaanka garoonka diyaaradaha caalamiga ah ee Aadan Caddulle Cismaan.

Inta la xaqiijiyey todoba ruux ayaa ku dhaawacantay. Lama soo warin illaa iyo haatan khasaaro dhimasho, balse saraakiisha caafimaadka waxay sheegeen in ay tirakoobayaan.

Ma jirto koox illaa iyo haatan dusha saaratay mas'uuliyadda qaraxan, balse waxaa looga bartay dagaalameyaasha Al-Shabaab ee gacansaarka la leh shabakadda Al-Qaacida.

Qaraxan ayaa wuxuu kusoo beegmayaa iyadda oo laamaha amniga ay mudooyinkii dambe bixiyeen digniino ku aadan in magaalada uu ku jiraan gaadiid miineysay.

GAROWE ONLINE

Wararkii ugu dambeeyey