Shirka Madasha oo ka furmay magaalada Muqdishu
MUQDISHU, Somalia- Waxaa Goor-dhow ka furmay magaalada Muqdishu Shirka Madasha Wadatashiga Qaran, ee looga hadlayo Arrimaha Doorashooyinka Somalia.
Madaxweynaha uu Waqtigiisu dhamaaday ee Somalia Xasan Sheekh Maxa'uud, ayaa si rasmi ah uga furay Shirka gudaha Xarunta AMISOM ee Xalane.
Shirka ayaa waxaa ka qeybgalaya Madaxweniyaasha maamulada Jubbaland, Koonfur Galbeed, Hir-Shabeelle, Galmudug, halka Puntland uga qeybgalayo madashan markii ugu horaysay Cabdixakiim Cumar Camey oo ah madaxweyne ku-xigeenka maamulkaasi.
Kulankan ayaa la sheegay in diiradda lagu saari doono arrimo ay kamid yihiin doorashooyinka socda iyo tabasho Puntland ay ka muujisay Aqalka sare gaar ahaan xubnaha ka imaanaya gobollada Sool, Sanaag iyo Cayn.
Arrimaha dib u dhaca iyo waqtiga ugu haboon ee doorashada la qaban doono ayaa sidoo kale looga hadli doonaa madashan oo dhawr bari socon doonta inkastoo aan la xaqiijin inta ay qaadan doonto
Diblomaasiyiin iyo Wakiilo ka socda Beesha Caalamka ayaa ku sugan Shirka, waxaana ay kala hadlayaan Madaxda Somalia Arrimaha Doorashooyinka dalka.
Guddoomiyaha Guddiga doorashooyinka heer federaal Avv. Cumar Dhagey ayaa kulanka looga dhageystay warbixin ku saabsan doorashooyinka ka dhacay xarumaha maamul goboleedyada, cabashooyin laga keenay meelaha qaar ee doorashada ka dhaceen iyo xaqiijinta qoondada
Xasan Sheekh Maxamud oo isna kulanka furay, ayaa bogaadin u jeediyay maamullada kasoo baxay howlihii loo xilsaaray, wuxuuna inta kale ee wali wax ku harsanyihiin ugu baaqay inay dhakhso u soo gaba gabeeyay doorashada Aqalka hoose ee Barlamanka Federaalka Somalia.
Michael Keating, Wakiilka Xoghayah guud ee QM ee Somalia, ayaa madasha ka hadlay arrimo ku saabsan doorashada dalka ka socota, wuxuuna mas'uuliyiinta madasha ku canaantay inaysan si wanaagsan ugasoo bixin ballamihii la qaaday ee ahaa in sannadkan waddanka Somalia ka hirgasho dowladd cusub iyo doorashooyin xalaal ah.
Shirkan ayaa waxaa Somalida, waxaa isugu yeeray Wakiilka Qaramada Midoobay ee Somalia, Michael Keating, waxaana sidoo kale laga yaabaa in lagusoo hadal qaado musuqa la sheegay inuu hareeyay soo xulista xubnaha Aqalka hoose ee Barlamanka Federaalka Somalia.
GAROWEONLINE