Wufuud Madaxweyne Gaas kamid yahay oo gaaray Cadaado
-
- Posted On 29-05-2017, 12:25PM
CADAADO, Somalia- Wafdi uu hogaaminayo Madaxweynaha Puntland, Cabdiwali Maxamed Cali Gaas, ayaa goordhaweyd gaaray magaalada Cadaado xarunta KMG ah ee Galmudug, halkaasoo lagu caleemo saarayo Axmed Xaaf.
Gaas ayaa markii ugu horaysay booqday Cadaado oo ay ku shaqayso xukuumadda Galmudug, taasoo khilaaf siyaasadeed kala dhaxeeyay muddooyinkii dambe oo qaybtood ka dhasheen dagaallo dhimasho, dhaawac iyo barakac sababay.
Booqashada Madaxweynaha Puntland ayaa aad looga hadal hayaa magaalada Cadaado, waana mid si gooni ah loo xiisaynayay sida ay GO u sheegeen dad goob joogayaal ah.
Socdaalkan ayaa ka duwanaa kuwa ay ku tagayaan madaxda maamullada sida; Jubbaland, Koonfur Galbeed iyo HirShabeelle.
Madaxweyne Gaas kama uusan hadlin socdaalkiisa, balse waxaa dadku aad isu weydiinayaan isbadalka laga dhaxli galo safarka Gaas.
Dhinaca kale, waxaa goobta caleemo saarka tagay Madaxweynaha Jubbaland, Madaxweyne ku-xigeenka HirShabeelle iyo Wakiilka Xoghayaha Qaramada Midoobey ee Somalia.
Xafladda oo aan wali bilaaban ayaa waxaa laga sugayaa Madaxweyne Farmaajo.
GAROWEONLINE
