Kenya oo sheegatay burburinta shabakad ka tirsaneyd kooxda AS

Howlgalkan ayaa si gaar ah waxa uu uga dhacay degaanada ku dhow xuduudka Soomaaliya.

NAIROBI, Kenya - Ciidamada Booliska dalka Kenya ayaa Sabtidii shalay howlgal ay ka sameeyeen degmada Gaarisa ee ku dhow xadka Soomaaliya waxa ay ku dileen shan ka mid ah argagixisada Al-Shabaab, halka ay ku xireen afar kale.

Booliska ayaa sheegay in afarta ruux laga soo qabtay goob ay ku dhuumaaleysanayeen oo ku taalla deegaanka Faafi, halkaasi oo ciidamada ay ka soo furteen labo qori oo PKM ah, lix qori oo AK47 ah, iyo agabyo kale oo walxaha qarxa laga soo buuxiyay.

Sida lagu sheegay warbixinta amniga, "Afartan shaqsi ayaa waxaa la weydiinayaa su'aalo lagu ogaanayo xog dheeraad ah, waxayna si wanaagsan ula shaqeeyaan booliiska."

Howlgalka oo ay hogaaminayeen ciidamada sirdoonka ayaa lama filaan ku noqday dagaalyahanada markii ay ka gudbeen gudaha dalka Kenya islamarkaana ay ka sameysteen xero ku meel gaar ah deegaanka Faafi ee magaalada Gaarisa.

Howlgalladan ayaa billowday kaddib markii ciidamada booliiska ay fashiliyeen qorshayaal ay kooxaha hubeysan ku doonayeen inay saldhig kaga sameystaan ​​Mangai oo ka tirsan degmada Lamu ee gobolka xeebta Arbacadii lasoo dhaafay, ayna burburiyeen qolkii ay ku jireen.

Booliska ayaa sheegay in tiro badan oo argagixisa ah lagu dilay, isla markaana qolku uu ku guda jiro abaabulka weerarro gaadmo ah oo lala beegsaday ciidamada ammaanka ee deegaanka.

Booliska ayaa sheegay in Al-Shabaab ay deegaanka Lamu u isticmaalayaan saldhig saadka si ay u weeraraan bartilmaameedyada deegaanka oo ay dib ugu gurtaan.

Ciidamadda Kenya ayaa intaas ku daray in ay fashiliyeen weeraro qorsheysan oo dhowr ah oo ka dhacay dalka, gaar ahaan kuwa ka dhacay gobolada Waqooyi, kuwaasi oo ay ka yara yaraayeen weerarada Argagaxiso.

Deegaanka ayaa ku dhow xuduudka Soomaaliya, waxaana dableyda ay inta badan u tallaabaan sidii ay rabaan oo ay weeraro uga geystaan ​​ka hor inta aysan dib u baxsan.

GAROWE ONLINE