Al-Shabaab oo weerar dhiig ku daatay ka fulisay gudaha Kenya

Dableyda weerarka geysatay ayaa la sheegay in ay u baxsadeen dhanka xadka Kenya iyo Soomaaliya.

NAIROBI, Kenya - Ugu yaraan saddex qof ayaa lagu dilay weerar ay maleyshiyaadka Al-Shabaab ka geysteen gobolka Gaarisa subaxnimadii Arbacada, sidda qortey saxaafadda.

Labadan askari iyo qof rayid ah ayaa la socday gaari ay wateen ciidamada booliska, waxaana lagu weeraray inta u dhaxeysa xerada Hayley Lapsset iyo Gaarisa.

Booliska iyo dadkii ka badbaaday weerarka ayaa sheegay in dabley markii hore ay adeegsadeen walxaha qarxa oo ay la beegsadeen gaariga booliska kadib kusoo tuureen baasuuke.

Saraakiil ka tirsan bileyska oo ay soo xigatay majaladda The Star ayaa caddeeyay in kooxda weerarka geysatay ay u baxsadeen dhanka xadka Kenya iyo Soomaaliya ee u dhow.

Laamaha amaanka ayaa heegan ku jiray muddooyinkii dambe kadib markii ay soo baxeen warar sheegaya in Al Shabaab ay qorsheynayaan weeraro halkaasi ka dhaca.

Deegaanka ayaa ku dhow xuduudka ugu weyn ee Kenya iyo Soomaaliya, kaasoo inta badan ay kasoo talaabaan maleyshiyo Al Shabaab ah oo doonaya in ay weeraro geystaan.

Dagaalameyaasha hubeysan ayaa si isdaba joog ah u beegsatay xarumaha nabad sugidda oo ay burburiyeen. Waxay mararka qaarkood tuuraan walxaha qarxa, kuwaas oo aan qarxin.

GAROWE ONLINE