Baarlamaanka Uganda oo ansixiyey sharci ka dhan ah Qawma-luudka

Sharcigan oo ay ku jiraan ciqaabyo adag ayaa sugaya ogolaanshaha madaxweyne Museveni.

KAMPALA, Uganda - Baarlamaanka Uganda ayaa Talaadadii shalay ahayd waxa uu si degdeg ah u meelmariyay sharci ciqaab adag kusoo rogaya dadka qawma-luudka ah ee ku nool dalkaas.

"Aqalkan kama xishoon doono in uu xaddido xuquuq kasta oo la gaarsiiyo inta uu Goluhu aqoonsanayo, ilaalinayo, ilaalinayo madax-bannaanida, anshaxa iyo dhaqanka dalkan," ayay tiri af-hayeenka golaha Anita Among.

Ciqaabaha uu dhigayo sharciga helay taageerada badan ayaa waxaa ka mid ah 10-sano oo xarig ah lagu xukumayo haddii laba qof isku-jinsi ah ay sameeyaa xiriir ama macaamil.

Sharcigu waxa kale oo uu xeerinayaa in qofka lagu helo inuu carruur u safriyo ama uga ganacsado ujeeddooyin salka ku haya falal khaniisnimo ah uu wajihi doono xabsi daa’im.

Sharcigan oo markii ugu horeysay la horgeeyay baarlamaanka horraantii bishan ayaa soo jiitay indhaha caalamka. Sharciga ayaa hadda sugi doona ogolaanshaha Madaxweyne Museveni.

Sannadka markii uu ahaa 2014-kii, maxkamadda dastuuriga ah ee Uganda ayaa waxay baabi'isay shuruuc lagu soo rogayo dadka qawma-luudka ah. Lama ogga haddii talaabo noocaan oo kale qaadi doonto.

Aragtiyada u adeegaya dadka khaniisiinta ah ayaa laga mamnuucay ilaa 30 waddan oo Afrikaan ah, halkaas oo dad badan ay u hoggaansamaan qiyamka diinta iyo bulshada ee muxaafidka ah.

GAROWE ONLINE