Ciyaaryahan u dhashay Uganda oo meydkiisa laga helay Kenya

Benjamin Kiplagat ayaa waxaa ka muuqdey dhaawacyo mindi oo qoorta iyo luqunta kaga yaallay.

NAIROBI, Kenya - Benjamin Kiplagat, oo Uganda ku matalayay saddex ciyaarood oo ciyaaraha Olombikada ah ayaa isaga oo meyd ah waxaa laga helay dalka Kenya, sidda ay warisay saxaafadda.

Warbaahinta maxaliga ah ayaa waxa ay sheegayaan in weerar mindi lala beegsaday. Balse, ma bixin fahfaahin dheeraad ah oo ku saabsan sidda uu u dhacay weerarkan.

Kiplagat oo 34-jir ah ayaa usoo gudbay ciyaaraha semi-finalka ciyaaraha Olimbikada London ee 2012-ka kadib markii uu baratamay ciyaarta tartanka 3000m.

Waxaa la sheegay in laga helay gaari isaga oo qaba dhaawacyo mindi ka soo gaareen oo laabta iyo luqunta kaga yaalla meel u dhow magaalada Eldoret ee dalka Kenya.

Eldoret ayaa waxa ay kamid tahay goobaha ay tababarka ku sameeyaan ciyaartoyda ka qeybg-galaysa tartamada Oroda gudaha Kenya iyo kuwa kale ee caalamiga ah.

Dhanka kale, Booliska dalka Kenya oo sii daayay war-saxaafadeed aysan ku jirin tafaasiil dheeraad ah ayaa tibaaxay in ay bilaabeen baaritaan ku aadan dhimashadiisa.

Ururka Ciyaaraha Fudud ee adduunka ayaa sheegay in ay "naxdin iyo murugo ka qaadeen" wararka ku aadan dhimashada Kiplagat, iyaga oo qoyskiisa, asxaabtiisa iyo dalkiisa uga tacsiyadeeyay.

GAROWE ONLINE