Hogaanka ONLF oo ku laabanaya Itoobiya iyo Abiy Axmed oo qorshe u dejiyay
-
Wariyaha Muqdisho GAROWE ONLINE
- Posted On 29-11-2018, 01:23PM
ADDIS ABABA - Wafdi 20-xubnood ka kooban oo ka socda hogaanka sare ee Jabhadda ONLF ayaa sabtida soo socota, 1-da December ku wajahan dalka Itoobiya.
Waxaa ku jira xubnaha gudoomiyaha ONLF, Maxamed Cumar, sida uu sheegay Afhayeenka ONLF.
Tani ayaa kusoo beegmaysa xilli todobaadkii tagey ay ciidamada ONLF ay ku laabteen Jigjiga, iyagoo kasoo guurey xeryahooda Eritrea, kadib heshiis Jabhadda la gashay dowladda Itoobiya.
ONLF iyo dowladda Itoobiya ayaa Asmra ku saxiixday bishii lasoo dhaafay heshiis lagu soo afjaray colaaddii labada dhinac u dhaxaysay.
Heshiiskan Taariikhiga ah ayaa u ogolaanaya ONLF inay qaab nabadeed ku raadsato hamigeeda siyaasadeed ee dalka Itoobiya, iyadoo ciidankeeda la qarameynayo, laguna biirinayo kuwa Federaalka.
Ra'iisul Wasaare Abiy Axmed ayaa dhawaan wadahadal la furay xisbiyadda siyaasadeed ee dalkiisa, kuwaasoo uu kala tashanayo sidii dalkaasi uga dhici lahayd doorasho dimuqraadi ah 2020-ka.
Xisbiyada waxaa ku jira kuwa mudo dheer dalka dibad-joog ka ahaa, oo hadda markii uu isbedelka ka dhacay dib ugu soo laabtey Itoobiya.
GAROWE ONLINE
