Injineer u dhashay Shiinaha oo lagu weeraray Kenya

Al-Shabaab oo sheegatay mas’uuliyada weerarka ayaa sheegtay in qaraxa uu qabsaday gaariga uu saarnaa Injineerka.

NAIROBI, Kenya – Maleeshiyada Ururka Al Shabaab ayaa laba qarax gobolka Waqooyi Bari Kenya kula eegtay kolonyo gaadiid ah oo galbineysay Injineer u dhashay dalka Shiinaha oo shaqo u jooga dalkaasi Kenya sida ay xaqiijiyeen saraakiisha deegaanka.

Qaraxyada oo laba ahaa ayaa ka dhacay inta u dhaxeeysa deegaannada Ijaara iyo Sangaa’ilow ee Magaalada laamu, waxaana mid kamida labadaasi qarax uu haleelay gaari ay saarnaayeen ciidamada booliska dalka Kenya, kaasoo sababay khasaare dhimasho iyo dhaawacba leh.

Kooxda Shabaab oo sheegatay mas’uuliyada weerarka ayaa sheegtay in qaraxa uu qabsaday gaariga uu saarnaa Injineerka u dhashay dalka Shiinaha oo ay ilaalo ka hayeen Ciidamada Kenya,

Maleeshiyada ayaa war ay faafisay ku sheegtay in ay  dishay Injineerka oo bartilmaameedka u ahaa balse sooma aysan bandhigin cadaymo muujinaya dilkiisa.

Dhanka kale Majirto wali wax war ah oo ka soo baxay laamaha amaanka dalka Kenya oo ku aadan weerarkan, waxaana inta u dhaxeeysa deegaannada Ijaara iyo Sangaa’ilow ee Magaalada laamu ka socda howlgalo balaaran ay sameynayaan ciidamada amniga.

Kooxda ayaa weli ah mid xooggan oo fir fircoon, waxaana ay mas’uul ka yihiin weeraro badan oo argagixiso oo ay ku dhinteen dad badan, sida weerarkii suuqa ganacsiga ee Westgate ee Kenya September 2013, qaraxyadii Muqdisho 14kii Oktoobar 2017 iyo qaraxii Muqdisho December 2019 kaas oo ay ku dhinteen dad kor u dhaafaya 100 qof.

GAROWE ONLINE