Itoobiya oo jartay Internet-ka kadib carro ka dhalatay dilka fanaan caan ah

ADDIS ABABA, Ethiopia – Dowladda Itoobiya ayaa lagu waramay in ay jartay adeega Internet-ka kadib dilka fanaan caan ahaa oo kasoo jeeday qowmiyadda tiradda badan ee Oromadda.

Hacaaluu Hundeessaa ayaa xalay fiidkii lagu khaarijiyey magaala madaxda Addis Ababa. Booliska oo xaqiijiyey falka wuxuu sheegay in ay ka dambeeyeen kooxo hubeysanoo aan la aqoonsan.

Xilli aysan jirin cid loosoo qabtay, illaa iyo haatan lama ogga sababta loo beegsaday heesaaga oo sanadkii 2017-kii noqday shaqsiga sanadka ee Oromada.

Dad ka careysan dilka Hundeessaa ayaa isu soo baxyo waaweyn ka dhigay caasimadda iyo qaybo kamid ah dalka; banaanbaxyadda ka dhacay meelaha qaar waxay wateen rabshado.

Warbixinadda horudhac ah ee illaa iyo haatan soo baxaya ayaa waxay intaas ku darayaan in dowladda ay sidoo kale hakisay isu socodka iyo korontadda.

Ra'iisul wasaare Abiy Axmed oo ka tacsiyeeyay geerida Hundeessaa ayaa balanqaaday baaritaano waafi ah, isagoo rajeeyay in gacanta lagu soo dhigi doono kuwa geystay toogashada.

Falanqeeyeyaasha oo tibaaxay in mudaaharaadyaddu yihiin "kuwa halis ah" ayaa cod dheer kaga digay in ay si adag ula tacaasho xukuumadda.

Itoobiya waa mid kamid ah wadamada ay ku yar yihiin dilalka qorsheysan, balse kuwa lasoo wariyey xilliyadda qaar waxay ka careysan yihiin dad badan maadaama la beegsado xubno caan ah.

GAROWE ONLINE