Madaxda Afrika oo ku hungoobay shirkii labada maalmood ee Ruushka

Madaxweynaha Ruushka, Vladimir Putin, ayaa soo afmeeray is-araggan iyadda oo natiijo aan la gaarin.

NAIROBI, Kenya - Hogaamiyeyaasha Afrika ayaa kasoo tagay kulamo laba maalmood ah oo ay la yeelanayaan madaxweynaha Ruushka, Vladimir Putin natiijo la'aan, sidda ay warisay VOA-da.

Madaxda ayaa ku hungoobay codsigooda ahaa in Putin uu dib u bilaabo heshiis ay ku ilaalinayeen haruurka ka soo qulqulaya Ukraine iyo in la helo waddo lagu soo afjaro dagaalka halkaas ka socda.

Putin oo shir jaraa’id qabtay goor dambe oo Sabtidii ka dib shirkii Ruushka iyo Afrika ayaa sheegay in joojinta Ruushka ee heshiiskii hadhuudhka horaantii bishan uu sababay sare u kac ku yimid qiimaha badarka.

Tani ayaa waxaa ka faa’iidaystay ​​shirkadaha Ruushka. Waxa uu intaa ku daray in Moscow ay la wadaagi doonto qaar ka mid ah dakhligaas "dalalka ugu saboolsan."

Ballanqaadkaas, oo aan wax tafaasiil ah lahayn, ayaa daba socota ballan-qaadkii Putin ee ahaa in uu bilaabo dhoofinta 25,000 ilaa 50,000 oo tan oo hadhuudh ah si bilaash ah.

Waxaa helaya mid kasta oo ka mid ah lixda waddan ee Afrikaanka ah saddexda ilaa afarta bilood ee soo socota. Tiradaas waxaa laga dhimay 725,000.

Tiradaas waxaa horey u soo rartay Barnaamijka Cunnada Adduunka ee Qaramada Midoobay iyadda oo loo talagalay dalalka Afrikaan ah iyo kuwo kale, oo hoos yimaada heshiiska hadhuudhka.

Ruushka ayaa qorsheynaya in uu badarka bilaashka ah u diro wadamadda kala ah; Burkina Faso, Zimbabwe, Mali, Somalia, Eritrea iyo Central African Republic oo xaalad khatar ay ka taagan tahay.

GAROWE ONLINE