Madaxweynaha Jabuuti oo si kulul uga hadlay afgambigii Gabon
-
GAROWE ONLINE XAFIISKA MUQDISHO
- Posted On 31-08-2023, 04:02PM
JABUUTI, Jabuuti - Madaxweynaha Jabuuti Ismaaciil Cumar Geelle ayaa ka hadlay afgambigii lagu eryay madaxweyne Cali Bongo ee ka qabsoomay dalka qaniga ku ah shidaalka ee Gabon
Madaxweyne Ismaaciil Cumar Geelle ayaa cambaareeyay mowqifka ciidamada, isagoo carabka ku adkeeyay in loo baahan yahay in la ixtiraamo hay’adaha dastuuriga ah.
Guddoomiyaha urur-goboledka IGAD ayaa ugu baaqay ciidamada in ay dib ugu soo celiyaan xukunka madaxda la doortay, isla markaana ay ka fogaadaan wax kasta oo khalkhal gelinaya ammaanka dalka Gabon iyo guud ahaan qaaradda Afrika.
Ilaalada Madaxtooyada Gabon ayaa abaabulay afgambi militari oo arbacadii ka dhacay dalkaas oo lagu baabi’iyay natiijadii doorashada uu dhawaan ku guuleystay madaxweyne Cali Bongo.
Iyada oo Beesha Caalamka ay cambaareysay afgambiga, ayaa waxaa soo dhaweeyay mucaaradka Gabon kuwaas sheegay in ay u mahadcelinayaan ciidamada, waxayna ka codsadeen in ay isugu yimaadaan kulan looga hadlayo mustaqbalka dalka.
GAROWE ONLINE
