Suudaan oo ku eedaysay IGAD ku xad-gudbka madaxbanaanida wadamada xubnaha ka ah

IGAD ayaa Hemedti u fidisay Casuumaad si uu uga qeyb galo shir madaxeedka la qaban doono 8-da bisha.

Khartoum (GO) - Wasaaradda Arrimaha Dibadda ee Suudaan ayaa ku eedaysay urur goboleedka IGAD in uu isu beddelay “qalab lagu shirqoolayo Suudaan iyo dadkeeda”, waxayna bayaan ay soo saartay ku dhaleecaysay mas’uuliyiinta martiqaadka u fidiyay taliyaha ciidamada taageerada degdegga ah, Maxamed Xamdaan Dagalo “Hemedti”.

IGAD ayaa Hemedti u fidisay Casuumaad si uu uga qeyb galo shir madaxeedka la doonayo in lagu qabto caasimadda Uganda ee Kampala, Khamiista 8-da bisha Janaayo.

Bayaanka ka soo baxay Wasaaradda ayaa lagu sheegay, "Tallaabadan waxa ay horseedi doontaa in la burburiyo kalsoonida lagu qabo IGAD, waxaana sabab u ah in uu wiiqo madaxbanaanida wadamada xubnaha ka ah”.

Dowladda Suudaan ayaa war-saxaafadeed gaar ah oo ay soo saartay ku sheegtay inaan loo baahnayn shir-madaxeedka cusub ee IGAD ay doonayso in Khamiista la qabto haddii aan la fulin qodobbadii ka soo baxay shir madaxeedkii kan ka horreeyay ee 9-kii bishan December lagu qabtay dalka Jabuuti.

GAROWE ONLINE