Mudane dhaliilay madaxwayne oo gurigiisa lagala baxay

Laamaha amniga iyo garsoorka midkoodna lama helin wax jawaab ah oo ku saabsan xarigga Ayari. [Photo: Tunisia Press]

TUNIS, Tunisia - Ciidamada ammaanka Tunisia ayaa gurigiisa KU xirey xildhibaan, sida ay sheegeen xaaskiisa iyo qareenka ka dib markii uu Facebook ku dhaliilay Madaxweyne Kais Saied kuna tilmaamay "inqilaab" la wareegidiisa guud ahaan awoodaha.

Yaasiin Ayari, mudane ka tirsan xisbi yar, ayaa hore u sameeyay dhaleeceyn joogto ah oo uu u jeedinayo Saied, oo Axaddii xilka ka qaaday ra’iisul wasaaraha, kalana diray Baarlamaanka kana dhawaajiyey in muddo bil ah oo uu la wareegayo awoodda fulinta.

Laamaha amniga iyo garsoorka midkoodna lama helin wax jawaab ah oo ku saabsan xarigga Ayari. Kama jawaabin codsiyo kala duwan oo warbaahinta caalamiga ah ay u dirtey.

Xaaska Ayari, Cyrine Fitouri, ayaa taleefanka ugu sheegtay wakaaladda wararka ee Reuters in ku dhawaad ​​20 nin oo xirnaa dhar cad iskuna sheegay inay yihiin xubno ka tirsan qeybta amniga madaxweynaha ay horaantii Jimcadii shalay ahayd ay weerareen gurigooda ayna adeegsadeen rabshado markii ay xireen.

“Waxay si xoog ah ku qaateen isaga oo hooyadii qaylinaysa," ayay tiri, iyada oo intaas ku dartay inay qoyska u sheegeen inaanay filim ka qaadin maadaama ay kaxeeyeen.

Dhanka kale, madaxweynaha Tunisia ayaa ballanqaaday inuusan isu beddeli doonin kaligii-taliye wuxuuna diiday eedeymaha ah inuu afgambi sameeyay.

Ficiladiisu waxay u muuqdaan inay taageero ballaadhan ka haystaan ​​Tunisia, halkaas oo sannado badan oo maamul-xumo, musuqmaasuq, curyaannimo siyaasadeed iyo fadhiidnimo dhaqaale ay sii xumeeyeen kororka dhimashada ee kiisaska COVID-19.

Garsoorka, oo ku dhawaaqay madax -bannaanidiisa siyaasadeed, ayaa caddeeyay in toddobaadkii lasoo dhaafay ay baaritaanno u fureen saddex xisbi siyaasadeed oo diidan hogaanka Kais Saied, "haddana waxaan bilownay baaritaanno ku aaddan dhowr xildhibaan".

Tunisia oo kamid ah dadkii ku guuleystay kcdoonka Carabta ayaa hadda u muuqaneysa mid kale ay halis ku jirto dimuqraadiyadeeda, waxaana aad looga walaacsan yahay in ay dib ugu laaban karaan qalalaase siyaasadeed oo isku rogi kara rabshado dhiig ku daato.

GAROWE ONLINE