Edgar Lungo oo loo doortey Madaxweynaha Zambia
-
- Posted On 25-01-2015, 07:27AM
January 25, 2015 (GO)- Edgar Lungu oo ka tirsan xisbiga haya talada Zambia ayaa ku guuleystey doorashadii madaxtinimada dalkaas, kadib markii uu ka adkaadey Hogaamiyaha Xisbiga UPND, Hakainde Hichilema.
Natiijada doorashada ayaa ahayd mid aad isugu dhow, Lungu wuxuu helay 48.33% codadka halka Hichilema ka helay 46.67%.
Hogaamiyaha Xisbiga UPND, Hakainde Hichilema oo kamid ah raga ugu hodonsan Zambia wuxuu kasoo horjeestey natiijada doorashada, isagoo sheegay in lagu shubtey kuna eedeeyey guddiga doorashada inay wax is dabo marin sameeyeen.
"doorashada lagu shubtey ma noqoneyso mid ka turjumeysa rabitaanka dadka Zambia" Hichilema ayaa yiri isagoo intaas raaciyey " hadii Edgar loo dhaariyo madaxweynaha dalka waa inuu ogaadaa inuu yahay madaxweyne aan sharci ahayn"
Edgar Lungu oo 58jir ah wuxuu noqonayaa madaxweynihii lixaad ee dalka Zambia yeesho laga soo bilaabo markii uu xornimada qaatey.
Doorashada madaxtinimada Zambia ayaa ahayd mid waqtigeedii laga soo hormariyey kadib geerida madaxweynihii hore Michael Sata oo bishii October ee lasoo dhaafay dhintey.
GAROWE ONLINE
