Koonfur Afrika oo yeelatay xukuumad ay ragga iyo dumar u siman yihiin
-
WARIYAHA ARRIMAHA AFRIKA
- Posted On 31-05-2019, 10:06AM
CAPE TOWN, South Africa – Madaxweynaha Koonfur Afrika, Cyril Ramaphosa, ayaa waxa uu magacaabay golle wasiiro cusub, kuwaasi oo markii ugu horeysay taariikhda dalkaasi ay kala bar dumar yihiin.
Talaabada kale ee lama filaanka ah ayaa waxay tahay in mid kamid ah haweenkaasi ay tahay mucaarad.
Siyaasiyada mucaaridnimada ku caan-baxday ee Patricia de Lille, taasoo ka tirsan xisbiga Good Party, ayaa laga dhigay wasiirka Horumarka Kaabayaasha Dhaqaalaha.
Xisbiga African National Congress ayaa ku guuleystay doorashada guud ee wadanka Koonfur Afrika, bishan May 8-deedeeda.
Dadka u duun-daloola arrimaha siyaaasadda dalkaasi oo "la yaabay" go’aankan ayaa ku sifeeyay madaxweynaha "xariif yaqaan waxay dadka ka filayaa iyo sida culeyska loo dejiyo".
Mr Ramaphosa ayaa wacad ku maray in uu yareyn doono wax uu ugu yeeray "gole wasiiro oo maal-qabeeno ah" kuwaasoo gaaraya 36 uuna ka dhigayo 28 xubnood Golaha Fulinta.
Hogaamiyaha dalkaasi koonfurta qaarada Afrika dhaca ayaa sidoo kale balanqaadey in uu xididaha u siibayo musuq-maasuqa balse dadka dhaliisan su'aalo geliyey "daacadnimadiisa".
Shaqsiyaadka naqdinaya hogaamiyahan ayaa ku doodaya in madaxweyne ku xigeenka, David Mabuza, uu qayb ka yahay wax is-dabamarinta.
Mr Mabuza, oo aad ugu dhowaa madaxweynihii hore Jacob Zuma, ayaa beeniyay eedeymo ku aadan in uu ku lug-yeeshay dilal siyaasadeysan iyo lun-sasho hanti Ummaddeed.
Sikastaba ha ahaatee, wasiirada cusub ee wadanka Koonfur Afrika ayaa la dhaariyey Khamiistii, waxaana la filayaa in ay xilalka la wareegi doonan maalmaha soo socda.
GAROWE ONLINE
